Ntekereza ko iyo bwije bugacya, buri wese uzirikana ko kuramuka kwe ari ku bw’Imbabazi z’Uwiteka zimuramukije, ariyorosora akarambura amaboko agashima Iyera ko ikomeje kumutiza umwuka w’abazima.
Nk’uko imwe muri korali zubatse umutamenwa wo kwizera mu mitima y’abanyarwanda yaririmbye iti: ’’Yewe Mwana wa Adamu wowe ugihumeka, mbese ntiwashimira Imana, ikugejeje aya magingo!"
Icyakubwira ko buriya za mpanuka tujya duhura nazo ku mihanda, bariya bagenzi usanga bangiritse, baba bafite imigambi myiza ndese n’ibitekerezo biboneye.
Niyo mpamvu tudakwiriye gutererana abugarijwe n’amakuba kuko wasanga umunsi umwe uzabona intoki zanditse ku rusika ngo ’’Mene Mene Tekeli Ufarisini’’ ushyize mu Kinyarwanda biravuze ngo "Ushyizwe ku Gipimo’’.
Ese wasanga ushyitse? Ni ibanga ry’Uwiteka na Albitre.
Kuri ubu, benshi mu byamamare muri Gospel bafite agahinda gakomeye bitewe n’Insanganya ziherutse kugwira ku muvugabutumwa watumye benshi bihana ibyaha byabo bakizera Yesu Kristo nk’umwami n’umukiza wabo.
Uwo ni Ev Steven Niyibeshaho wamenyekanye cyane mu nyigisho zuzuye Ijambo ry’ubwenge akaba umwe mu bavugabutumwa bitabiriye ibiterane bikomeye. Kuri ubu ararembye bikomeye. Ibi bibaye nyuma yo kugwa mu gico cy’abagizi ba nabi bakamuteragura ibyuma.
Nyuma y’ubu bugome kuri ubu amakuru agera kuri Paradise.rw avuga ko arembeye bikomeye mu bitaro bya Kigali CHUK ndetse akaba atabarizwa n’ibyamamare muri Gospel Nyarwanda kugira ngo avuzwe ndetse yitabweho yongere gufata Microphone abwirize ubwoko bw’Uwiteka.
Ev. Steven yakubiswe n’aba bagizi ba nabi mu ijoro ryo kuwa 23 rishyira kuwa 24/09/2023 (Hari kuwa Gatandatu nijoro Saa tanu na 45) ubwo yari asoje ikiganiro kuri Amavuta TV dore ko akunze gutambutsa ubutumwa kuma Shene ya Youtube atandukanye nk’umusesenguzi mu bijyanye n’iyobokamana.
Ubwo yasozaga ikiganiro cyitwa ’’Menya ukuri", yafashe inzira arataha, ageze ku muhanda uri muri cartier atuyemo, yahuye n’abagabo umunani biganjemo abambaye amakote. Ev Steven yabanje gukeka ko abo bagabo bagiye mu bukwe.
Umwe yaramwegereye amukubita umutego aragarama, abandi nabo bamujya hejuru baramukubita. Abari bitwaje ibyuma muri bo batangiye kumutera ibyuma basoje bamusiga aho bakeka ko yapfuye.
Nyuma yo kubona ko abo bagome bagiye, yafashijwe n’abagiraneza bamugeza kwa Muganga akaba arwariye mu bitaro bya Kigali CHUK.
Amakuru Paradise.rw yahawe na Issa Noel Karinijabo umunyamakuru wa Isango Star akaba umushyushyarugamba, ndetse na nyiri Amavuta Tv, yagize ati: ’’Kuri ubu Ev Steven ararembye nyuma yo kugirirwa nabi".
Amakuru Paradise.rw ifite ni uko bamwe mu banyamakuru barimo Issa Noel ndetse na Joel wa Iyobokamana.rw ari bamwe mu basuye uyu mukozi w’Imana akaba atabarizwa dore ko uretse gukubitwa inyundo n’ibindi bikoresho, yambuwe n’ibyo yari afite byose.
EV Steven ni Umukristo mu itorero rya ADEPR Nyarugenge akaba yaravukiye mu muryango wa Gikristo dore ko Mama we ari umukristo wa ADEPR Cyahafi. Uyu mukozi w’Imana witabiriye ibiterane bitabarika azwi ku bw’Igiterane cyitwaga ’’Menya Ukuri’’.
Iki ni igiterane cyabaye mu mwaka wa 2018 kikabera muri Bambino Hotel. Iki giterane Ngarukamwaka cyamamazwaga ku ma Radiyo na Televiziyo zitandukanye. Ni igiterane cyatumirwagamo abahanzi bakomeye kikaba cyaramuritse umuramyi Danny Mutabazi
Uyu muvugabutumwa wagiye ategura amahugurwa y’abavugabutumwa agamije kwagura impano. Aribukwa ku nyigisho yiswe ’’Umupfu ni Uwande", "Umuzima ni uwande", "Inka zirindwi z’Iminanu" ndetse na "Inka zirindwi zibyibushye."
Ev. Steven arembeye muri CHUK
Ev. Steven yarakubiswe agirwa intere
Ev. Steven ni umwe mu bavugabutumwa bakomeye muri ADEPR
UWAKENERA GUFASHA EV. STEVEN YANYURA KURI TELEFONE YE IKURIKIRA: 0788266001
