× Home Ministries Choirs Pastors Bible Entertainment Development Health Love Fashion Music

Dore inshanguruzo 7 zikomeje gukokora umuziki wa Gospel mu Rwanda - Ubusesenguzi

Category: Analysis  »  August 2023 »  Ev. Frodouard Uwifashije [Obededomu]

 Dore inshanguruzo 7 zikomeje gukokora umuziki wa Gospel mu Rwanda - Ubusesenguzi

Reka mbanze norohereze abana bavukiye i Nyamirambo n’i Texas batazi "Urushanguruzo cyangwa uruhaburuzo".

Ubundi urushanguruzo ni igikoresho cyifashishwa n’abahinzi b’urutoki mu gihe bakeneye amakoma yo kwifashisha mu gutara ibitoki, gusa rushobora no kwifashishwa mu gikorwa cyo kombera urutoki aho usanga insina ifite amakoma menshi yiganjemo ayumye, mu rwego rwo kugira ngo ikure neza, hifashishwa urushanguruzo.

Iyo bamaze cyangwa bamaraga gukonda insina, yasigaragaho amakoma makeya. Hari igihe rero nk’umwana yafataga urushanguruzo agakata amakoma yose ya ngombwa cyangwa se agakomeretsa igitoki. Ibi byatumaga insina yuma ihagaze kuko amakoma yo kuyirinda izuba yatemwe, iyo nsina bayitaga inkokore.

Tugiye kureba ibintu bikomeje gukokora umuziki wa Gospel, kuko niba ntagikozwe uyu muziki wazasigara ku izina gusa.

Mu rwandiko Pawulo yandikiye Timothee yagize ati "Umuhinzi niwe ukwiye kubanza kwenda ku mbuto" (2 Thimothee 2:6). Gusa, iyo witegereje mu muziki wa Gospel usanga atari ko bimeze.

Guhanga biravuna, Guhimba bigasaba guhirimbana, byagera ku mujyo wo guhuza injyana n’umujyo bikaba ingorabahizi! Ntimugire ngo nibagiwe uburyo kwishyura inzu zitunganya injyana bihenda. Gusa iyo bigeze kuri Promotion (Gusakaza ubutumwa, Kugeza indirimbo ku bagenerwabikorwa) noneho bikaremera cyane.

Gusa kuvunika si cyo kibazo, ikibazo ni ukuvunika ntugere ku ntumbero zawe bitewe nawe ubwawe cyangwa se biturutse ku kibuga kinyerera ukiniramo cyangwa se bitewe n’imishibuka ivanze n’amahwa itezemo. Ikibabaje hari igihe umuramyi abiba igihe cy’isarura cyagera bikaribwa n’inyoni, cyangwa se bigasarurwa n’abanyamwaga basarura aho batabibye we agatahira guhumba.

Mu busesenguzi Paradise.rw yifashishije abagabo babiri bafite ubunararibonye muri Gospel aribo Issa Noel Karinijabo umaze imyaka 13 mu itangazamakuru ndetse na Costa Callixte Ndabarasa Sebatware ubarizwa muri Urugero Media Group akaba ashinzwe gutegura amarushanwa.

Ndabarasa Sebatware yabaye umunyamakuru mu myaka irindwi hagati ya 2006-2013 aho yakoreye Urugero Media Group na Radio Authentic ndetse yarakoranye imyaka myinshi na Issa Noel Karinijabo muri kompanyi yitwa Urugero Media Group.

Mu rwego rwo kurushaho gusobanukirwa

1. Ishyari n’agapingane & Gutegura ibitaramo bigamije guhangana: Ishyari, ryatumye Yosefu agurishwa muri Egiputa (Itangiriro 30:1). Sebatware Callixte (Costa) yakomoje ku ishyari rikomeje kuvugwa mu bahanzi batandukanye ndetse n’abapasiteri. Yavuzeko ishyari rigendana n’agapingane aho yavuze ku ntambara ziba mu itegurwa ry’ibitaramo.

Yagize ati "Muzabibona aho umuntu ategura igitaramo agamije guhangana n’undi kuko yakoze iki, nanjye nzakora ikirenze". Yavuze ko ibi bituma ibitaramo bita umurongo wo kwagura ubwami bw’Imana bigahinduka kwihimbaza aho umuntu akeneye ko ariwe wemerwa kuruta abandi.

2. Imyumvire y’amatorero itajyanye n’icyereyezo cy’igihugu: Bwana Callixte Ndabarasa yagaragaje ko amwe mu matorero afite imyumvire idafasha iterambere muri Gospel. Yagize ati "Iyo urebye imyumvire cyangwa se icyerecyezo cy’igihugu, iyo bibaye Gospel za Christianism, ni ukuvuga ubutumwa butangwa muri Gospel usanga buhabwa abakiristo gusa aho guhabwa abanyarwanda muri rusange.

Yagize ati "Kuza gukomanga mu nzego za Leta ngo zigushyigikire muri ubu butumwa buzaba bufite igice kimwe cy’abantu bugenewe nabyo ni ikibazo." Yongeyeho ati "Ni nayo mpamvu abantu bibaza bati ’Kuki abaterankunga bataza muri Gospel?’.

Yatanze urugero ati "Niba wenda ari Airtel abaclients bayo ni abanyarwanda muri rusange utitaye ku myizerere yabo baba bayifite cyangwa batayifite. Yongeyeho ko iyo sosiyete y’ubucuruzi igaragaje uruhande ishaka gushyigikira.

3. Guca intege abafatanyabikorwa ba Gospel: Mu mboni za Issa Noel abona zimwe mu mbogamizi zatumye abaterankunga ba Gospel bahagarika ibikorwa harimo ingaruka z’icyorezo cya Covid-19 ndetse n’ibicantege.

Ku bivugwa ko abateguraga amarushanwa atandukanye nka Groove Awards na Salax Awards bagiye bananizwa n’amwe mu madini ndetse n’amatorero, yagize ati "Hari amatorero n’amadini atarabyumvaga, rimwe na rimwe bakabona aba bafatanyabikorwa nk’abantu baje guhangana nabo".

Yatanze urugero rw’umunsi wo gutanga ibihembo aho wasangaga badashaka ko abo bantu bahagera. Ibi abihuriyeho na Callixte Ndabarasa wagize ati "Muri uyu murimo ntabwo ibicantege byabura, ariko nabyo biterwa n’icyo abantu batekereza ndetse n’icyo bateganya kuzayikuramo".

Yavuze ko mu myaka yashize, gushora muri Gospel byagiye bigorana bitewe n’Imyumvire ica intege ijyana n’uko agakiza ’twakaboneye Ubuntu’. Yavuze ko hari abantu bafata ibintu byose bya Gospel nk’aho ari Ubuntu ariko ntibarebe n’imbaraga byatwaye kugira ngo ibyo byiza babibone. Avuga ko byagiye bigorana mu bihe bitandukanye kuba wakora igikorwa runaka cyo muri Gospel uteganya ko wagaruza amafaranga washoyemo.

4. Ihangana hagati y’amadini n’amatorero: Ku ruhande rwa Costa, asanga Ihangana hagati y’amadini n’amatorero ari imbogamizi ikomeye ku iterambere rya Gospel. Ati’’Bitandukanye n’uyu munsi, ha mbere ibitangazamakuru bitaraba byinshi, hataraza za Youtube channel, mu bihe byo hambere wasangaga channel ufite watangarizaho ibikorwa bya Gospel ari mu nsengero.

Byasabaga kujya gukomanga mu nsengero, ariko gukomanga mu itorero runaka ngo mwatwemerera kuza kudutangira iri tangazo, ko hari igikorwa iki n’iki ugasanga ntibishoboka kuko utari umuyoboke waryo. Ugasanga irindi riragufasha kuko uri Umukristo waryo ribikore, hakaba n’irindi rikwemereye ariko hakaba abatakwemereye kandi ugasanga icyo gikorwa kiri mu nyungu z’ubwami bw’Imana.

Ibi yabihuje n’imyumvire n’imitegekere n’ubuzima bwa buri munsi bw’amadini n’amatorero aho usanga bamwe ari aba ADEPR, abandi Abadiventistes, abandi aba Zion, abandi aba Restoration, ugasanga uwo badasengana yitwa umupagani. Yavuze ko uko kwirema ibice bigenda bica intege bikanafunga inzira zatuma abantu bakora umurimo w’Imana, cyangwa se kuba hakorwa ikintu cyatuma umuhanzi wa Gospel atera imbere.

5. Abanyamafaranga bari muri Gospel badafite Impano: Callixte asanga muri Gospel harimo bamwe mu bantu bayirimo badafite impano yo kuririmba, nyamara kuko bafite amafaranga ugasanga nibo bavugwa cyane mu binyamakuru bitandukanye.

Yagize ati "Ibi usanga itangazamakuru ribigiramo uruhare aho ritayungurura rirebe ngo tugiye gutanga iki? Ariko kuko hari amafaranga yatanze iki kintu n’ubwo atari cyiza akaba ari cyo gitambutswa mu binyamakuru bitandukanye.

Yatanze urugero ati "ugasanga nko kuri website, hari umuntu uhora akorwaho inkuru n’iyo yakoroye barandika ko yakoroye, nyamara hari undi muntu uri mu bikorwa bitandukanye byo kwagura ubwami bw’Imana, afite n’impano yo ku rwego rwo hejuru;

Ariko kuko nta kiguzi cyo gutangaza ibyo bikorwa yabashije kubona bikarangira ibyo bintu bipfukiranywe, bigahera iyo ngiyo…:". Yavuze ko ibi bituma abantu bibeshya ko abantu bakomeye cyangwa beza dufite (Abanyempano) ari abavugwa nyamara hari abandi batavugwa kandi barusha impano abavugwa.

6. Ruswa y’igitsina: Mu mboni za Callixte asanga kuba hari abantu babarizwa muri Gospel by’umwihariko badakijijwe bigira ingaruka zikomeye aho usanga hari n’abadatinya kwaka ruswa y’igitsina abana b’abakobwa kugira ngo bazamure izina ryabo.

Ati’’Hari n’Aba Producers bashuka abana b’abakobwa, bashaka kubasambanya, cyangwa yamukorera indirimbo akumva ko agomba kuryamana nawe kugira ngo amukorere indirimbo yamukoreye. Ibi no muri Gospel bibamo’’.

7. Abahanzi bazamuka bagaca ikiraro cyabahuzaga n’itangazamakuru ryabazamuye: Indi mbogamizi Costa yatangaje ni ukwishongora kw’abahanzi bamaze gutera imbere nyamara itangazabakuru ryarabafashije gutera imbere.

Yatanze urugero rw’umuhanzi bafashije nka Urugero Media Group ari ku ishuri yiga hanze, ageze mu Rwanda yaje ku kibuga cy’indege baramwakira hategurwa na Conference, ariko abamufashije bakoranye nawe abanyarwanda bose bakamumenya, ntiyashatse kugaragaza ko bamufashije.

Yavuze ko batigeze bacika intege kuko bari bafite icyo bashaka ndetse birinze kugaragaza mu itangazamakuru inyandiko z’imikoranire bari bafitanye kuko basanze ntacyo byakungura ubwami bw’Imana. Yavuze ko hari undi utabasha kwihangana muri ubu buryo ariho hava amakimbirane.

Ese hakorwe iki ngo Gospel ibe ikiraro gikura abantu muri Gehinomu kikabajyana mu ijuru? Pawulo yandikiye Abakorinto (2 Abakorinto 2:15) ati "Kuko turi impumuro nziza ya Kristo ku Mana hagati y’abakira n’abarimbuka". Gospel ni umuyoboro w’ubutumwa bwiza, abayibamo ni icyitegerezo cya benshi.

Hari ibikomeje gukokora umuziki wa Gospel mu Rwanda

Ndabarasa Sebatware (Costa) ni umwe mu mpirimbanyi z’umuziki wa Gospel

Issa Noel kuva kera kugeza uyu munsi aracyahirimbanira iterambere ry’umuziki wa Gospel

Issa (ibumoso) na Costa (iburyo) babanye mu Urugero Media Group iyoborwa na Arnaud Ntamvutsa (hagati)

Tanga igitekerezo kuri iyi nkuru

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

Ibitekerezo Byatanzwe

Paradise rw murasobanutse.Nsabiye umugisha uyu munyamakuru Obededomu akora inkuru nziza.Mbega teem hano!!!!! Ari ibishwanguruzo!!!! Byakamejeje kbsa!!!! Gusa Gospel byo yicwa na biriya,ntabwumwe nta terambere

Cyanditswe na: Buregeya Aimee   »   Kuwa 07/08/2023 03:19

Muraho? Ndi umukunzi wa Paradise.rw,ndagirango Nsabire umugisha uyu munyamakuru wa Paradise.rw ukomeje kwandika inkuru zubaka iyobokamana.

Uzi ngingo rwose nizo,izi nshanguruzo zishe gospel pee.
Gusa iyi ngingo yabahanzi bafashwa n’itangazamakuru bamara kuba ibyamamare bagatangira kurirebera kurutugu byica gospel

Ndi umunanzi utaramenyekana,mperutse gusaba umunyamakuru serivisi arangije arambaza ari, ESE wowe ntuzamera nk’abandi dufasha bamara kuba ibyamamare bagasiba nimero yacu? Nahise mbonako abahanzi twambaye umwambaro w’urubwa umugani wanyu

Umuti,bahanzi bageze iyo mujya,MWe gusibira abandi amayira.

Cyanditswe na: Niyonkuru Providence  »   Kuwa 06/08/2023 02:25