Iyi ni inyigisho yatanzwe na Pastor Christian Gisanura ku wa 19 Gashyantare 2026, agaruka ku nsanganyamatsiko igira iti: “Data ni we soko y’umutekano n’icyubahiro.”
Pastor Christian Gisanura yasobanuye ko nk’uko umubyeyi ari isoko y’umutekano n’icyubahiro ku mwana, ari na ko Imana Data ari isoko y’umutekano nyakuri ku muntu wese uyigumamo.
Umuntu avuka adafite imbaraga, nta bushobozi bwo kwirinda cyangwa kwitunga. Arindwa n’ababyeyi, bakamugaburira, bakamwambika, bakamuvura, bakamurinda imbeho n’akaga. Umwana agira agaciro kuko afite uwo akomokaho; izina ry’umubyeyi rimufungurira amarembo.
Iyo umubyeyi yitwaye neza, ibyo akora biba umurage w’umwana; iyo yitwaye nabi, ububi bwe na bwo buba bushobora gusiga icyasha ku bazamukomokaho. Ibi bitwigisha ko ibikorwa byacu by’uyu munsi ari imbuto zizasarurwa n’abazadukomokaho ejo.
Mu mibereho ya buri munsi, hari aho abifite n’abafite ububasha batoteza abo barusha imbaraga. Ariko igihe kiragera ukuri kukigaragaza. Hari inkuru Pastor Christian Gisanura yahishuye, yerekana ko umuntu wigishijwe na Se umubyara neza, yamurihiye kaminuza imyaka 2.
Uwo mwarimu w’umunyakuri, yatumye umwana we Pastor Christian azabona imbuto z’ubunyangamugayo bwe, abana be bafashwa kubera izina ryiza yasize.
Ibi bigaragaza ko icyubahiro cy’umubyeyi kiba umusemburo w’amahirwe y’abana be. Bityo buri wese akwiriye kwibaza ati: “Ni iki nsigira abazankomokaho? Ndi kubafungurira amayira cyangwa ndi kuyafunga?”
Inyigisho zashimangiye ko Imana ikora nk’Umubyeyi urinda abana be kandi akabahamagarira kugira icyo bakora. Zishingiye ku gitabo cy’Abaroma 8:28-37 hagira hati
Kandi tuzi yuko ku bakunda Imana byose bifataniriza hamwe kubazanira ibyiza, ari bo bahamagawe nk’uko yabigambiriye, kuko abo yamenye kera yabatoranirije kera gushushanywa n’ishusho y’Umwana wayo, kugira ngo abe imfura muri bene se benshi.
Abo yatoranije kera yarabahamagaye, kandi abo yahamagaye yarabatsindishirije, n’abo yatsindishirije yabahaye ubwiza.
None ubwo bimeze bityo tuvuge iki? Ubwo Imana iri mu ruhande rwacu umubisha wacu ni nde? Mbese ubwo itimanye Umwana wayo ikamutanga ku bwacu twese, izabura ite kumuduhana n’ibindi byose? Ni nde uzarega intore z’Imana? Ni Imana kandi ari yo izitsindishiriza?
Ni nde uzazicira ho iteka? Ni Kristo Yesu kandi ari we wazipfiriye, ndetse akaba yarazutse ari iburyo bw’Imana adusabira? Ni nde wadutandukanya n’urukundo rwa Kristo? Mbese ni amakuba, cyangwa ni ibyago, cyangwa ni ukurenganywa, cyangwa ni inzara, cyangwa ni ukwambara ubusa, cyangwa ni ukuba mu kaga, cyangwa ni inkota?
Nk’uko byanditswe ngo “Turicwa umunsi ukīra bakuduhōra, Twahwanijwe n’intama z’imbagwa.” Oya, ahubwo muri ibyo byose turushishwaho kunesha n’uwadukunze,
Aho hagaruka isezerano rikomeye: ko ku bakunda Imana, ibyo bakora byose bifataniriza hamwe kubazanira ibyiza. Ibyo ntibisobanura ko ibibazo bitabaho, ahubwo bisobanura ko n’ibibazo Imana ibivunjamo umugisha ku bayiringira.
Umuntu ashobora guhura n’ingorane atabishatse, ariko iyo agumye mu bushake bw’Imana, ibimubabaza bishobora guhinduka inzira y’agakiza.
Hari umuhamagaro ku muntu wese. Imana imenya, igatoranya, igahamagara, igatsindishiriza, kandi igaha ubwiza abayizera. Ariko ikibazo si uko Imana ihamagara; ikibazo ni uko bamwe bumva umuhamagaro ntibawitabe, cyangwa bakawitaba batinze.
Icyubahiro n’umutekano nyakuri bibonerwa mu kwitaba uwo muhamagaro no kuguma mu bushake bw’Imana. Nk’uko igihugu kirinda abari mu mipaka yacyo, ni na ko Imana irinda abari mu bwami bwayo. Iyo umuntu avuye mu murongo w’Imana, aba ashyize ubuzima bwe mu kaga k’umwuka.
Hari n’ikindi kibazo gikomeye: abantu bamwe iyo babonye umugisha, bibagirwa Isoko yawubahaye. Bashobora gusenga bashaka akazi, bashaka urugo, bashaka kuzamurwa mu ntera; ariko bamara kubibona bagasubira inyuma mu gukorera Imana.
Ibyo ni ukwikura ku isoko kandi amazi atarashira. Kwibagirwa Imana nyuma yo guhabwa umugisha ni ukwiyima umutekano w’ejo hazaza, no kwiyima indi migisha, kuko iyo uba ufite ntiba ihagije.
Mu by’ukuri, nta tandukaniro rinini riri hagati y’abariho n’abapfuye, uretse ko abakiriho bagifite umugambi bagomba gusohoza. Kuba tugihumeka ni uko hari inshingano dufite. Pawulo yavuze ko kubaho kwe ari Kristo, kandi ko gupfa ari inyungu; ibi byerekana ko agaciro k’ubuzima kari mu kubaho mu bushake bw’Imana.
Iyo Imana iri mu ruhande rwacu, nta mbaraga zishobora kudutsinda. Nta wadushinja cyangwa ngo adutsinde burundu, kuko Kristo adusabira ku Mana. Nta makuba, inzara, cyangwa inkota byadutandukanya n’urukundo rwayo. Ariko mu ruhande rw’Imana tuhabonera umutekano iyo twemeye kuguma mu bushake bwayo.
Bityo, nk’uko umubyeyi ari isoko y’umutekano n’icyubahiro ku mwana, ni na ko Imana Data ari isoko y’umutekano n’icyubahiro ku muntu. Guma ku isoko, wubahe umuhamagaro wawe, usige umurage mwiza, kandi uzabona icyubahiro kirambye n’umutekano nyakuri.
