Ntabwo Imana yaremeye abantu bose gutura i Kusi, ahubwo Imana yagutuza i Gosheni hazwiho kuruta ahandi ubwiza. Witegereza ko igihe cyo kugotwa kigera ngo ubone gushaka amazi azagutunga kuko inzira zijya ku Iriba zizaba zafunzwe.

Dore inama rero. Ngwino wivomere amazi ku Iriba rimara inyota, iryo riba ni Yesu Kristo. Icyo ni cyo cyatumye Korali Imbaraga z’Imana itegura iki giterane cy’umugisha. Ntuzasibe!.

Umuramyi ukunzwe cyane Danny Mutabazi wananditse indirimbo "Kumusaraba" ya Vestine & Dorcas n’zindi ebyiri baheruka gushyira hanze, yatumiwe mu giterane cy’amashimwe cyiswe "Amashimwe Live concert", cyateguwe na Korali yitwa "Imbaraga z’Imana".

Korali Imbaraga z’Imana, ikorera umurimo w’Imana mu itorero rya CELPAR -Kigali riyoborwa na Rev. Pastor Fred Nyamurangwa. Ni imwe muri korali zimaze kugira izina dore ko imaze imyaka 16 nyuma yo gutangira umurimo w’iyogezabutumwa mu mwaka wa 2007.

Hagamijwe gukomeza kuzana no kugarura abantu ku Mana, iyi korali yateguye igiterane cy’amateka kizaba ku cyumweru Taliki ya 27/08/2023, kikazabera kuri C.E.L.P.A.R. Kanombe (ESSA Nyarugunga).

Ni igiterane gifite intego iboneka mu gitabo cy’Itangiriro 26:22 ahari amagambo agira ati “Avayo afukuza irindi riba, ryo ntibaritonganira aryita Rehoboti, aravuga ati: ”None Uwiteka adushyize ahagutse, natwe tuzororokera muri iki gihugu”.

Mu kiganiro yagiranye na Paradise.rw, Mama Pasteur Ingabire Solange akaba ariwe uyoboye korali Imbaraga z’Imana muri iki gihe yagize ati: "Ni igiterane cy’umugisha, ndasaba abantu kuzitabira iki giterane kugira ngo bafatikanirize hamwe natwe kuramya Umwami Yesu Kristo no kumushimira ibyo yakoze ku musaraba".

Ntabwo iyi korali izaba iri yonyine kuko izataramana na Ebenezer Choir; Penuel Worship Team ndetse na Dany Mutabazi mu ndirimbo nziza zirimo Carvary, Wanyuranyije amaboko, Amarira y’ibyishimo n’izindi. Ijambo ry’Imana rizagaburwa na Rev Pst Fred Nyamurangwa.

Tubibutse ko iyi korali imaze gushyira hanze Video 2 ikaba ikomeje inzira yatangiye yo kubwiriza ubutumwa bwiza.

Danny Mutabazi ategerejwe muri iki giterane mbaturamugabo

Mama Pasteur Ingabire Solange umuyobozi wa Korali Imbaraga z’Imana

Rev Past Fred Nyamurangwa umugabura w’ijambo ry’Imana

Korali Imbaraga z’Imana

Ni igiterane cyateguwe na Korali Imbaraga z’Imana