Ni yo nzira Christian Nduwimana na Calmene Kanyamuneza bahisemo kunyuramo, bakaba bakomeje kwigaragaza nk’itsinda rishya ry’abaramyi bakomoka mu Burundi ariko batuye muri Leta Zunze Ubumwe za Amerika.

Aba bombi baherutse gushyira hanze indirimbo nshya yitwa “Nezerewe”, bakoranye na RCC Worship Team, bagaragaza icyerekezo gishya mu rugendo rwabo rwa muzika no mu murimo wo kuramya Imana.

Christian na Calmene bashakanye ku wa 19 Gicurasi 2017. Bavuga ko kimwe mu byo bishimira cyane mu rugendo rwabo rw’urushako ari uko Imana yabahuje bafite intego imwe yo kuyikorera no kuyihesha icyubahiro.

Nubwo urukundo ari rwo rwabanje kubahuza, bavuga ko kuba bahuriye ku muhamagaro wo kuramya Imana byatumye umubano wabo urushaho gukomera no kugira icyerekezo gihamye.

Mu buzima bwabo bwa buri munsi, basangiye inshingano zo kuyobora ibikorwa byo kuramya no guhimbaza Imana mu itorero basengeramo rya Rehoboth Christian Church (RCC) riherereye i Phoenix muri Arizona.

Christian na Calmene bari basanzwe bakunda umuziki kuva kera. Nubwo buri wese yari afite impano ye ku giti cye, batangiye gutekereza kuwukora nk’abashakanye mu buryo bwagutse mu mwaka wa 2020, mu gihe isi yari ihanganye n’icyorezo cya Covid-19.

Ni bwo batangiye gutegura indirimbo zabo no gukora amajwi ku rwego rw’umwuga, bafite intego yo kugeza ubutumwa bwiza ku bantu benshi binyuze mu muziki.

Kuki gukora umuziki muri couple bifite akamaro?

Abasesenguzi mu bijyanye n’umuryango n’umuziki bavuga ko iyo abashakanye bahuje umuhamagaro bakorana umurimo umwe, bibafasha gukomeza ubumwe no gushyigikirana mu rugendo rwabo.

Mu muziki wa Gospel by’umwihariko, gukora umuziki muri couple bifasha: Gusangira intego imwe n’icyerekezo kimwe mu murimo w’Imana; Gushyigikirana mu bihe by’ibigeragezo no mu rugendo rwa muzika; Gutanga ubuhamya bufatika bw’urukundo n’ubumwe ku bandi;

Kugeza ubutumwa bwiza ku bantu benshi binyuze mu mpano bahuriyeho; Gutoza abana n’umuryango muri rusange gukorera Imana nk’itsinda.

Ni imwe mu mpamvu zituma amatsinda y’abashakanye akora Gospel akunze kugira umwihariko mu butumwa atanga, kuko usanga ubuzima babamo ari bwo bugaragarira mu bihangano byabo.

“Nezerewe”, indirimbo y’ubuhamya n’agakiza

Indirimbo yabo nshya “Nezerewe” ni ubuhamya bw’umuntu wamaze kumenya Kristo no kwakira ubuntu bwo kubabarirwa ibyaha. Igaragaza ibyishimo by’umuntu wahinduwe mushya n’agakiza, akava mu buzima bwa kera agahinduka icyaremwe gishya muri Kristo.

Christian na Calmene bavuga ko ubutumwa bukubiye muri iyi ndirimbo bugamije kwibutsa abantu ko agakiza atari amagambo gusa, ahubwo ari impinduka nyakuri zigaragara mu buzima bw’umuntu.

Aba baramyi bavuga ko “Nezerewe” ari intangiriro y’ibindi bikorwa byinshi bafite mu rugendo rwabo rwa muzika.

Bamaze gutunganya izindi ndirimbo nyinshi mu buryo bw’amajwi (audio), ndetse batangaza ko bazagenda bazisohora buhoro buhoro mu minsi iri imbere, hamwe n’andi mashusho mashya.

Mu gihe bakomeje gukorera Imana muri RCC Worship Team no gukora umurimo wo kuramya Imana nk’abahanzi ku giti cyabo muri Phoenix, Christian na Calmene bafite intego yo gukomeza gukoresha impano zabo mu kwamamaza ubutumwa bwiza bwa Yesu Kristo.

Biyemeje guhembura imitima y’abatari bake binyuze mu muziki

Christian na Calmene ni bamwe mu bagize itsinda RCC Worship Team banakoranye iyi ndirimbo yabo nshya "Nezerewe"

RYOHERWA N’INDIRIMBO NSHYA "NEZEREWE" CYA CHRISTIAN & CALMENE