Ku wa 9 Gicurasi 2025, umuraperi wa Gospel, Bright Patrick yasohoye indirimbo nshya yise "To the King", yahuriyemo n’umuhanzikazi Lina. Indirimbo ifite umwihariko mu butumwa, injyana n’ubutumwa bujyanye n’igihe.
Mu butumwa bujyanye n’iyi ndirimbo, Bright Patrick wamamaye mu ndirimbo "Umucunguzi" avuga ko “To the King” yaturutse ku bitekerezo byimbitse yagize ku buzima bwa buri munsi—ku kazi, ku nshuti, ku miryango, ku bukene n’ubukire.
Ni indirimbo ikubiyemo igitekerezo cy’uko hari aho umuntu agera mu buzima agasanga nta wundi wamufasha uretse Imana. Yabwiye Paradise ati: “Umuntu ni we utekereza icyo gukora, ariko umwanya wo kugera aho umuntu yumva ko nta wundi wamufasha uretse Imana, nta muntu utawugeramo.”
“To the King” ni indirimbo Bright Patrick yakoranye na Lina, umukobwa bamenyanye mu mpera z’umwaka wa 2023 mu minsi mikuru ya Noheri. Icyo gihe, Bright yari yaririmbye mu gitaramo ku rusengero rwabo, maze yumva uburyo Lina aririmba neza.
Babifashijwemo n’inshuti, bahuje imbaraga bakora iyi ndirimbo y’icyubahiro ku Mana. Amuvugaho yongeyeho ati: “Ni Umukristo kandi ni umuririmbyi mwiza.”
Bright Patrick ni umwe mu bahanzi ba mbere batangije Hip-Hop ya Gospel mu Rwanda. Ariko avuga ko ubutumwa bwe butagenewe Abakristo gusa, ahubwo bunareba cyane “abari mu mwijima”—abantu bo ku muhanda, abari mu biyobyabwenge n’abandi babayeho mu buzima butari bwiza.
Aganira na Paradise, Bright Patrick yavuze kuri iyi ngingo agira ati: “Twagenewe kujyana ubutumwa ahantu hatari mu itorero.” Ariko ntiyibagirwa no kuvuga ko n’abo mu itorero hari ubwo bagwa, ndetse bamwe mu bakozi b’Imana na bo bashobora kugusha abantu. Bityo, yabageneye ubutumwa mu ndirimbo ziri imbere.
Nubwo gukorera umuziki hanze y’u Rwanda bitamworohera, Bright Patrick avuga ko atazahagarara. Afite izindi ndirimbo zirimo gutunganywa, harimo n’imishinga akorana n’abandi baraperi ba Gospel. “Icy’ingenzi ni ukudahagarara, uko twagenda gake cyangwa twihuta kose, icya mbere ni ugukomeza.”
Indirimbo “To the King” irushaho kuryoha iyo igeze ku nyikirizo yayo iririmbwa mu Cyongereza:
I will raise my hands singing praises to Him
Surrender my plans and my life to the King
Aha, asaba ko abantu bahindura ubuzima, bakegurira Imana imigambi n’ubuzima bwabo, bamenya ko ari yo yonyine ishoboye.
Indirimbo irimo amagambo akomeye nka: “Ngarutse streets, mfite itabaza kuko Umwami andinda amajya namaza…” “I didn’t know peace until I knew his name…”
Aya magambo agaragaza ubuhamya, urugendo, n’icyerekezo cya Bright Patrick. Ni indirimbo irimo “flow y’amakare,” ariko irimo umutima wa Gikristo n’ubutumwa butanga ibyiringiro.
"To the King" yasohotse ku wa 9 Gicurasi 2025 kandi iri kuboneka ku mbuga zose zicuruza umuziki. Abakunzi ba Gospel na Hip-Hop bashishikarijwe kuyumva no kuyisangiza abandi, kuko itanga icyizere, urumuri, n’icyubahiro cy’Imana.
REBA INDIRIMBO "TO THE KING" KURI YOUTUBE
Bright Patrick ni umwe mu bahanzi bubashwe mu muziki wa Gospel mu Rwanda
