Abaramyi Ben na Chance batangaje ko bafite indi ndirimbo nshya bateganya gushyira hanze, izaba yeguriwe umwana wabo w’umuhungu, mu gihe bakomeje imyiteguro y’igitaramo gikomeye bazakorera muri BK Arena kuri Pasika.
Mu butumwa batanze, bagaragaje ko bifuza ko buri mwana wabo azajya yumva ko hari indirimbo bamukoreye by’umwihariko, ari yo mpamvu iyi ndirimbo ya kane bazasohora bayeguriye umwana wabo w’umuhungu.
Ben na Chance bavuga ko zimwe mu ndirimbo zabo zishingiye ku rugendo rw’ubuzima banyuzemo nk’ababyeyi, cyane cyane ku bana babo. Batangaje ko nyuma yo kubura umwana wabo w’imfura, banditse indirimbo Ugushikamijeho Umutima.
Nyuma yo kongera kubona umwana wa kabiri bakoze indirimbo Yesu Arakora. Nyuma y’uko Imana ibashumbushije, baje kwibaruka umwana wa gatatu, uyu akivuka nawe azana inganzo y’indirimbo bise ‘Zaburi yanjye’, mu gihe uwa kane we bakimubyara bahise bakora iyitwa ‘Igikombe cyanjye’.
Mu 2025 uyu muryango wibarutse undi mwana wa gatanu w’umuhungu [abana bane ni bo bariho kuko imfura yabo yitabye Imana] bari no gukorera indirimbo bemeje ko bateganya gusohora mu minsi iri imbere.
Icyakora nubwo bafite amashimwe ku bw’imirimo y’Imana, Ben na Chance bagaragaje ko batajya bibagirwa ibihe bikomeye banyuzemo nyuma yo gupfusha imfura yabo cyane ko byabasabye gutegereza imyaka irenga itatu batarabona undi mwana.
Ben yagize ati “Hari igihe bajyaga badutumira mu birori by’isabukuru y’umwana nk’ahantu, tukavuga ngo ubu n’uwacu baba bangana, ndibuka hari igihe umugore wanjye twabaga turi nk’ahantu abantu baganira baseka tuti buriya nitwe bari guseka.”
“Ya nda y’umugore bitaga ingumba kuko abantu bambwiraga amagambo bari benshi. Byari ibyishimo ko byibuza tumaze kubona umwana wa kabiri!”
Aba baramyi bari mu myiteguro y’igitaramo bise Easter Jubilee Music Gathering, giteganyijwe ku wa 5 Mata 2026 muri BK Arena. Ni igitaramo bazaba bakoze bwa mbere muri iyi nyubako yakira abantu benshi, nyuma y’uko abakunzi babo bagiye bagaragaza ko bifuza kubabona bahataramira.
Kugeza ubu amatike y’iki gitaramo yamaze gushyirwa ku isoko. Itike ya Upper Room igura 5,000 Frw mbere y’igitaramo na 10,000 Frw ku munsi wacyo; Stage View igura 10,000 Frw mbere na 15,000 Frw ku munsi w’igitaramo. Hari kandi Premium igura 20,000 Frw, Altar Zone igura 25,000 Frw, CIP Zone igura 35,000 Frw ndetse na Executive Zone igura 50,000 Frw.
Amatike ari kuboneka ku rubuga rwa www.ticqet.rw cyangwa ugakoresha kode 5130101#, ndetse ushaka andi makuru wahamagara kuri nimero 0787837802.
Mu rwego rwo gukomeza kumenyekanisha iki gitaramo, Ben na Chance banasohoye indirimbo nshya y’amashusho bise Igikombe Cyanjye ku wa 5 Werurwe 2026, ikomeje kwakirwa neza n’abakunzi babo.
Ben na Chance bamaze imyaka irenga 10 baririmbana nk’umugabo n’umugore, bakaba bazwi mu ndirimbo zirimo Zaburi Yanjye, Yesu Arakora, Amarira, Impano y’Ubuzima, Mu Nda y’Ingumba n’izindi.
Aba baramyi batangaje ko bifuza ko igitaramo cya Pasika cyajya kiba ngarukamwaka, kikaba umwanya wo guhuriza hamwe Abakristo mu kuramya no guhimbaza Imana, banibuka izuka rya Yesu Kristo.
Reba indirimbo IGIKOMBE CYANJYE - Ben & Chance kuri YouTube
