Uyu muryango wa Women Foundation ni umuryango washinzwe na Apostle Mignonne Kabera nk’ibisanzwe. Muri iyi minsi, mbese muri uku kwezi kwahariwe abagore, uyu muryango na wo wakoze ibikorwa bitandukanye byo gukomeza kugaragaza ko abagore bashoboye muri byose, atari mu mirimo isanzwe ya Leta cyangwa indi yo mu rugo gusa, ahubwo ko bashoboye n’iyo kuvuga ubutumwa bwiza.

Ibi birushaho kumvikana iyo ufashe umwanya muto ugatekereza kuri Apostle Alice Mignonne Kabera wagize ubutwari agashinga itorero rya Noble Family Church n’umuryango wa Women Foundation wo gufasha abagore kumva ko bashoboye gutangaza ubutumwa bwiza bw’Umwami Yesu Kristo.

Ni muri urwo rwego na Nyirapasika we n’umuryango we muri rusange bahawe impano y’akataraboneka kuri uyu wa Gatandatu tariki ya 16 Werurwe 2024. Nubwo Apostle Mignonne yayitanze yisegura ngo ni iya make, ariko guhabwa imodoka ya miriyoni umunani n’igice z’Amafaranga y’u Rwanda ni ikintu gitangaje, noneho gikozwe n’umugore kandi agikorera undi nta nyungu yindi amutezeho, uretse kumugirira impuhwe no kumufasha.

Uyu mugore Nyirapasika akigera muri uyu muryango wa Women Foundation yarubatswe cyane, bikaba byanabaye bimwe mu byatumye Apostle Mignonne amuha imodoka. Mignonne yagize ati: “Hari n’ikindi gikorwa twashatse gukora cyo gushimira Imana, hari umumama twashatse kugira ngo dufashe. Twabanje kureba, ni benshi bo muri Musanze, ariko hari umumama wo muri Musanze washoboye kubakwa muri uyu murimo, amaze kubakwa aza kwimuka muri aka gace.

Kubera kubakwa, ntiyahimutse kubera ikindi, n’ibikorwa bye biracyahari, ariko biba ngombwa ko ajya mu Mugi wa Kigali nyuma yuko ageze muri uyu murimo. Uwo mumama ni Nyirapasika, reka azane n’umutware we.

Uyu mubyeyi si amashuri ukurikije ubuhamya bwe bwagarukiraga ku gusonga ubugari ku musozi wa ndabirambiwe, ariko kuko muzi ko turi umurimo w’ivugabutumwa, nanone ujya kubutera aribanza. Twashyigikiye abandi, ariko muri ba bandi b’ivugabutumwa dushaka ko bagenda bagaha amaboko benshi bakagera kure, Nyirapasika uyu munsi aba agenda mu bihugu bitandukanye.

Nyuma yarambwiye ati: “Umbwiye ngo unyishyuriye indege ngo nge Dubai, naravuze nti burya si urupfu”, ariko nyuma agarutse n’uyu munsi agenda ibihugu bitandukanye. Ariko nta kintu kibi nko kugenda ibihugu bitandukanye, wagaruka ukagenda na moto (uyiteze na bwo). Rero na we twaje kugira ngo amaboko tuyamuhere iwabo i Musanze. Nyirapasika n’umutware we wakomeje guhagararana na we, tubabwire ko dufite imodoka iri hariya hanze.”
Iyi modoka ya miriyoni umunani n’igice bayitanze mu buryo bw’ishimwe, mu rwego rwo kugenda bubaka umugore.
Amarira yamusaze, arapfukama ashima Imana.

Nyirapasika yahawe imodoka ya miriyoni 8 n’igice