Tariki ya 02 Ugushyingo 2025 ni itariki y’amateka kuri Jesca Mucyowera wamurikiraga rimwe Album 2 arizo "Yesu arashoboye" ndetse na "Imana irakomeye".

Mucyowera yataramiye imbere y’abashumba barimo Apostle Mignonne Kabera, Pastor Desire Habyarimana na madamu we, Pastor Solange Masengo, Bishop Karemera Emmanuel, Apostle Serukiza Sosthene n’abandi.

Hari kandi n’abaramyi barimo nka Aline Gahongayire, Fabrice & Maya Nzeyimana, Jean Christian Irimbere, Arsene Tuyi, Ben & Chance, Kagomakimana, Papi Clever na Dorcas, Gaby Kamanzi, Jado Sinza na Esther, Rene Patrick na Tracy, Alexis Dusabe na Madamu, G-Tuff n’abandi. Aba bose banyuzwe cyane n’iki gitartamo bakurira ingofero Jesca Mucyowera.

Bimwe mu byaranze Iki gitaramo cy’amateka:

Elayono Worship yishimiwe bikomeye. Ahagana saa kumi n’imwe ni bwo Elayono Worship yazamutse ku ruhimbi. Mu mwambaro mwiza cyane w’umutuku n’umweru aba baririmbyi bahawe rugari mu ndirimbo zabo nziza ziganjemo iziri kuri album nshya bitegura kumurika.

Emma Rwibutso yakuriwe ingofero. Umuramyi Emma Rwibutso ni umwe mu banejeje imitima y’abitabiriye Iki gitaramo. Uyu muramyi usigaye akundwa n’abatari bake, ubwo yageraga ku ruhimbi benshi babonye impinduka mu kirere cya Camp Kigali.

Mu buturo bwawe bwera, Haradudubiza amazi meza. Ubwo yaririmbaga indirimbo ye "Amazi meza", Rwibutso Emma yasendereje ibyishimo imitima y’abitabiriye Restoring Worship Xperience.

Urwenya rwa Agasaro Tracy. Agasaro Tracy wari umushyushyarugamba yashimishije abitabiriye Iki gitaramo cya Jesca Mucyowera.

Ubwo yasabaga abantu kumwakira, uyu muramyi uzwiho kugira ijwi rirangurura yagize ati: "Ndi ikibaju cya Yesu cyiza cyane"!!
Muhaguruke twakire ikibaju cya Yesu!!" Iyi mvugo yashekeje abitabiriye igitaramo.

Jesca Mucyowera yagaragaje urwego rwo hejuru rw’imiririmbire. Saa 06:45 nibwo hatangiye kugaragara ibimenyetso by’uko Jesca Mucyowera agiye guhabwa agatuti.

Izi saha umusangiza w’umwanya yasabye abantu gutuza ndetse no kuzimya amatara. Yahise azamura ijwi rirenga ati: "Ubwo atagusize cya gihe na n’ubu ntabwo azagutererana!! Abari aho ntibamutereranye ahubwo bamwakiye.

Amaso yose bayahanze uruhimbi!! Buri wese afite amatsiko yo kumenya aho uyu muramyi ari buturuke! Mbere yo kwinjira hashyizweho ’documentare’ ivuga ku buzima bw’uyu muramyi wavutse tariki ya 01/06/1991.

Akaruru kenshi cyane! Mu ikanzu nziza ya chocolate, ahagana saa 06h55 Jesca Mucyowera wari wambaye ikanzu nziza cyane y’ibara rya chocolate yageze ku ruhimbi. Mbere yo kuririmba yiragije Umurenyi azamura isengesho ry’imbaraga.

Yinjiranye indirimbo "Eloyi", ati: "Mana yanjye ni Iki kikundekesheje? Uko ni ko Umwami wanjye yatatse ari ku musaraba, yaziraga ibyaha byanjye nawe. Yarimbye izindi ndirimbo zirimo: Ntazagutererana, Eloyi, Ikubambiye amahema, Jehova Adonai n’izindi.

Apotre Mignonne yahesheje umugisha Jesca Mucyowera anamuha miliyoni 5 Frw

Apotre Mignonne Kabera umuyobozi wa Women Fondation Ministries akaba n’umushumba mukuru w’itorero Noble Family church ni we wari umugabura w’ijambo ry’Imana.

Mbere yo kubwiriza yavuze ibigwi bya Tracy umushyushyarugamba. Ati: "Ladies and gentlemen, Tracy ndamushimye ariko ubwoko bw’amavuta afite ntayo ndagira!!"

Ageze kuri Jesca Mucyowera yavuze ubutwari bwe ati: "Umudamu Imana yasize amavuta kandi akaba afite umumaro ku mubiri wa Kristo".

Yavuze ko Jesca Mucyowera nyuma yo kunyura mu bintu bitandukanye no mu maboko y’abashumba batandukanye ageze igihe cyo kumurikwa.

Mu kwigisha Ijambo ry’Imana, Apotre Mignonne ati: "Twahawe ubushobozi bwo kwitwa abana b’Imana."

Yifashishije ijambo rivuga ku nkuru z’abisirayeli bamanitse Inanga bari i Baburoni ati: "Kristo yaguhaye gushikama, guhagarara n’igihe turi i Baburoni no mu bihe bikomeye."

Uyu mushumba akaba ari we wamuritse album 2 z’uyu muramyi aho Women Fondation Ministries yaguze album ya Jesca Mucyowera amafaranga y’u Rwanda miliyoni 5.

Tubibutse ko Iki gitaramo cyari kigamije kubohora imitima iboshye nk’uko ijambo ’restoring’ ribisobanura. Ni cyo gitaramo cya mbere Jesca Mucyowera akoze, ariko avuga ko atari cyo cya nyuma.

Ni igitarazwe cyaranzwe n’ibihe byo kubohoka ndetse kinabonekamo iminyago aho abatari bacye, bakiriye agakiza bagatangira inziga ijya mu ijuru.

Uretse Apotre Mignonne watunguye Jesca akamuha impano ya Miliyoni 5 Frw, abana ba Jesca Mucyowera nabo batunguye nyina bamuha impano yateguwe n’umugabo we uba muri Leta Zunze Ubumwe za Amerika. Byari umunezero mwinshi cyane.

Jesca Mucyowera yakoze igitaramo gikomeye

Ibyamamare byakuriye ingofero Jesca Mucyowera

Rwibutso Emma yizihiye cyane abitabiriye iki gitaramo

Akari ku mutima wa Jesca Mucyowera nyuma y’igitaramo cye cya mbere