Abantu bo hirya no hino muri Leta Zunze Ubumwe z’Amerika, muri Kanada n’ahandi, baje kureba uko Perezida wa 47, Donald Trump arahira, birangira abenshi batamubonye kuko ikirere cyari kibi akarahirira mu nzu.
Kuri uyu wa 20 Mutarama 2025, ku wa Mbere, i Washington mu Murwa Mukuru wa Leta Zunze Ubumwe z’Amerika — Abashyigikiye Perezida Donald Trump bakoraniye hamwe bizihiza irahira rye nka Perezida wa 47 wa Amerika, nubwo ubukonje bukabije bwatumye umuhango wimurirwa imbere mu nyubako ya Capitol Rotunda ntibamubona arahira.
Itsinda ry’abantu baturutse impande zose z’igihugu ndetse n’ahandi ku isi, berekeje ku Kibuga cya National Mall bahamara amasaha menshi bategereje ko Perezida arahira, nubwo batashoboye kureba umuhango wo kurahira, kuko wabereye imbere mu nyubako bitewe n’ubukonje bwinshi cyane bwari buhari. Abenshi bagaragaje ko byabababaje, gusa banagaragaza ko bagifite umuhati wo gushyigikira Trump.
Ingero:
Devin Purcell, umunyeshuri w’imyaka 18 uturuka muri Pennsylvania, yari yaje kwitabira irahira ku nshuro ye ya mbere. Yavuze ko yasobanukiwe impamvu umuhango wimuriwe imbere, kubera ikirere, ariko yifuzaga ko habaho uburyo ibiri kuhabera byerekanirwa hanze. Yongeyeho ati, "Ndacyari hano, naje gushyigikira Perezida Trump."
Tarek na Mary, umugabo n’umugore baturuka i Montreal, Canada, baje kwitabira uyu munsi w’amateka, bawufata nk’“inzozi zabaye impamo.” Tarek yahuje amagambo ya Trump yerekeranye no kuba Abanyakanada bakwinjira muri Amerika, no gushyira igitutu ku bayobozi ba Kanada avuga ati, "Benshi bifuza impinduka mu buyobozi bwacu."
Muri iyi Manda nshya itangiye, abashyigikiye Trump bafite icyizere kinini ko azasohoza ibyo yasezeranye kandi agakemura ibibazo by’igihugu n’isi muri rusange.
Abantu baturutse hirya no hino muri Amerika baje kureba Irahira rya Perezida Donald Trump, gusa byarangiye batamubonye kuko hari ubukonje bwinshi
