Mu busanzwe, iki Kigega Gatolika Mpuzamahanga cyo muri Sikotilandi (Scotland) Gitanga Ubufasha ku batishoboye, cyibanda cyane cyane ku bo mu bihugu bikennye cyangwa bikiri mu nzira y’iterambere. Gifasha abahuye n’ibiza, kigaha ubufasha burambye abahanganye n’ibibazo by’inzara, ubukene n’intambara.

Ubuyobozi bw’iki kigega bwatangaje ko ubufasha bagiye gutanga mu Rwanda buratangira gukusanywa muri iki gisibo cya Pasika yo muri uyu mwaka wa 2024, bukazifashishwa mu gufasha Abanyarwandakazi batishoboye kubera ihohoterwa ritandukanye bagiye bakorerwa cyangwa iryo bagikorerwa.

Nubwo gikorera mu bihugu bitandukanye, ku Banyarwandakazi ni umwihariko, kuko abenshi bagihanganye n’ingaruka za Jenoside yakorewe Abatutsi mu mwaka 1994, aho abarenga miliyoni babuze ubuzima mu minsi ijana gusa. Ibi ni bimwe mu byatumye iki kigega cyiyemeza gukorana n’u Rwanda, kugira ngo bagerageze kurwana n’izo ngaruka zirimo n’iz’ubuzima.

Abazafashwa, ni abari mu kigero cy’imyaka iri hagati ya cumi n’itanu na mirongo ine n’ikenda (15-49), nk’uko Bnn Breaking dukesha iyi nkuru yabitangaje, mu nkuru yayo yo ku wa Gatanu tariki ya 9 Gashyantare 2024, ivuga ku ruzinduko rwa SCIAF mu Rwanda.

Umuyobozi Ushinzwe Ibijyanye n’Ubukangurambaga Ben Wilson yagize ati: “Ni igihugu cyagerageje uko gishoboye ngo cyivane muri ibyo bibazo.” Ibi bibazo ni Jenoside yakorewe Abatutsi, kandi u Rwanda ruracyakora uko rushoboye ngo ruhangane n’ingaruka zayo.

Uyu muyobozi yavuze ko abagore n’abakobwa bo mu Rwanda, cyane cyane abo mu cyaro bagikomeje guhohoterwa n’abagabo. Ati: “Dufatanyije n’abafatanyabikorwa bacu, turi gukorana n’aba bagore ndetse n’abakobwa bahohotewe, kugira ngo bagarure ikizere cyo kubaho, binyuze mu mishanga ikorwa n’abagore ndetse igenewe abagore.”

Ben Wilson yatangaje ko imbaraga bari gushyira mu guhindura imitekerereze ya sosiyeti hagamije gutuma abagore n’abakobwa babaho neza, bubashywe, bahabwa agaciro, barinzwe, zizatuma ihohoterwa ricika burundu.

Ibi byose bikubiye mu bufasha bazabaha burimo ubwo kwiga, kubona akazi, guhanga ubucuruzi buciriritse, ubw’isanamitima, n’ubw’ubumenyi ngiro bubafasha kugaruka i buntu.

Iki kigega cyatangijwe na Monsignor John Rooney na mugenzi we John McKee mu mwaka wa 1965, kuri ubu gikorera mu bihugu birenga 16, nk’uko inkuru iva kuri Scotland Malawi Partnership ibisobanura. Ibyo muri Afurika harimo u Rwanda, Malawi, Etiyopiya, Sudani y’Epfo na Zambiya. Ibindi ni ibyo muri Asiya n’Amerika y’Epfo.

Mu Rwanda, cyatangiye gukoreramo mu mwaka wa 1994, itanga ubufasha ku bari bafite ibibazo bikomeye batewe na Jenoside yari ikimara guhagarikwa, mu bari batuye mu Rwanda no ku bari barahungiye muri Repubulika Iharanira Demokarasi ya Kongo, cyita cyane ku bafite ihungabana barimo n’abagore bakorewe ihohoterwa rishingiye ku gitsina.

Uyu mwaka SCIAF iratanga ubufasha ku Banyarwandakazi bari hagati y’myaka 15 na 49 bahura cyangwa bahuye n’ibibazo by’ihohoterwa

Ni ikigega cya Kiliziya Gatolika yo muri Scotland gikorera no mu Rwanda kuva mu mwaka wa 1994