Itorero ADEPR ni rimwe mu matorero akora ibikorwa byinshi bijyanye no kuremera abarokotse Jenoside yakorewe Abatutsi muri 1994 aho buri mwaka baba bateguye ingengo y’imari ihagije yo gukora ibi bikorwa hirya no hino mu matorero n’ama Paruwasi n’indembo ndetse no kurwego rw’igihugu.

Bimwe mu bikorwa bibandaho harimo nko gusanira no kubakira abarokotse Jenoside yakorewe Abatutsi muri 1994, kuboroza inka, amahugurwa ku rubyiruko, gusura inzibutso zitandukanye n’ibindi byinshi tutashidikanya ko nuyu mwaka tuzabona ibisa na byo.

Amadini n’amatorero, abahanzi ndetse n’amakorali atandukanye bakomeje gutanga ubutumwa bw’ihumure ku Rwanda n’Abanyarwanda by’umwihariko itorero ADEPR ryatanze ubutumwa bw’ihumure ku Banyarwanda by’umwihariko abarokotse iyi Jenoside.

Ni ubutumwa bwanyuze ku ku rukuta rwa ADEPR rwa X aho itorero ADEPR ryavuze ko ryifatanije n’abanyarwanda bose kwibuka ku nshuro ya 30 Jenoside yakorewe Abatutsi muri 1994.

Bagira bati: ”Itorero rikomeje urugendo rwo guhindura ubuzima bw’abantu mu buryo bwuzuye hifashishijwe ubutumwa bwiza bwa Yesu Kristo. Twibuke Twiyubaka”.

Si ubwa mbere kuko no mu mwaka ushize ubwo Umushumba Mukuru w’Itorero rya ADEPR mu Rwanda, Rev. Ndayizeye Isaie yaravuze ati: "Mu bintu bitubabaza cyane ni uko byageze igihe bamwe mu bari abashumba n’abakirisitu bagatakaza umutima wa gishumba, ubumuntu n’ubukirisitu kandi ibyo uyu munsi dukwiye kubyigiraho mu ngamba zo guhindura no kubaka umukirisitu n’Umunyarwanda ukenewe."

lcyo gihe yabivuze yitabiriye umuhango wo kwibuka ku nshuro ya 29 mu rurembo rw’umujyi wa Kigali mw’ijambo yagejeje kubari bitabiriye yavuze ko kwibuka ari umwanya wo guhumuriza abarokotse Jenoside yakorewe Abatutsi by’umwihariko abahungiye ku nsengero.