Umuririmbyi wa Gospel wahawe ibihembo bya Grammy, Tasha Cobbs Leonard, yongeye kwandika amateka nyuma yo kugira album ye ya gatandatu igera ku mwanya wa mbere ku rutonde rwa Billboard Top Gospel Albums binyuze kuri album ye ya mbere ya studio yise Tasha.

Billboard yamushimiye ko yakoze album ifite “imvange idasanzwe ya Pop, Hip-Hop n’injyana ya R&B isa nk’iyakunzwe mu myaka ya za 80.” Album Tasha yasohotse ku ya 25 Nyakanga 2025, ikaba yarashyizwe hanze ku bufatanye bwa Motown Gospel, TeeLee Gospel, na Capitol CMG.

Iyo album ikubiyemo imikoranire n’abahanzi b’ibyamamare barimo: Lecrae mu ndirimbo I Needed God; John Legend mu ndirimbo Church; Chandler Moore mu ndirimbo I Want More ndetse na Kirk Franklin mu ndirimbo I Still Choose You.

Indirimbo Church yagiye ahagaragara bwa mbere ku mwanya wa 5 ku rutonde rwa Top Gospel Songs.

Uretse kuyobora urutonde rwa Top Gospel Albums, album Tasha yanashyizwe ku mwanya wa: 41 ku Top Album Sales (urutonde rusanzwe rwerekana albums zigurishijwe cyane), ndetse no ku mwanya wa 28 kuri Top Current Album Sales (z’ubu).

Uyu muririmbyi w’indirimbo zo kuramya no guhimbaza Imana ukomeye ku isi, Tasha Cobbs Leonard, mu butumwa bwuzuyemo amarangamutima yasangije abamukurikira kuri Instagram, yagaragaje uko yari yaramaze kwiyemeza guhagarika umuziki, akumva igihe cye cyo kuririmba cyari cyarangiye, ariko Imana ikongera kumwibutsa ko “intego y’ubuzima itarangira, ahubwo ko ikura, igahindura isura n’ijwi ariko igakomeza kuba intego.”

Yavuze ko agira ishimwe rikomeye ku Mana n’imbabazi zayo, ndetse anashimira buri wese wagize uruhare mu gutuma iyi album igera aho igeze – abayumvise, abayisangije, abayanditse, abayisengeye, n’abagize uruhare mu kuyitunganya.

Tasha yashimiye cyane umugabo we Kenneth Leonard Jr., wakoze production y’indirimbo zose ziri kuri iyi album, avuga ko buri ndirimbo yasohotse uko yayitekerezaga.

Yanashimiye Sir Clark D ku mikorere ya tekiniki n’ivangavanga ry’amajwi, Naomi Raine wagaragaye nk’umugisha ukomeye wamufashije kwikuramo ibirenze ibyo yatekerezaga, Kenny A. Miller, n’abandi bahanzi baririmbye mu majwi asanzwe ashimangira ubutumwa bw’indirimbo (bgvs) barimo Annalonelle, Linny Smith, na Jahcee Smiles.

Mu gusoza ubutumwa bwe, Tasha yashimiye itsinda ryose ryamufashije: aba producers, Motown Gospel (label yamusohokanye), abacuranzi, n’itsinda rimufasha mu buzima bwa buri munsi barimo Joi, Vel, Clarissa, Charles, Jerome, na Jalynn.

Tasha Cobbs Leonard ni muntu ki?
Tasha Cobbs Leonard ni umuririmbyi w’indirimbo zo kuramya no guhimbaza Imana ukomoka muri Leta Zunze Ubumwe za Amerika. Azwi cyane ku ndirimbo ze nka “Break Every Chain”, “For Your Glory”, n’izindi zafashije imitima ya benshi kwiyegereza Imana.

Yatangiye kuririmba akiri muto mu rusengero rwa se, nyuma aza kwamamara cyane guhera mu mwaka wa 2013. Ni umubyeyi, umugore (umugabo we ni:) w’umuhanzi n’umuyobozi w’indirimbo Kenneth Leonard Jr., akaba kandi ari umwe mu bahanzi bafatwa nk’inkingi ya mwamba mu muziki wa gospel muri iki gihe.

Reba imwe mu ndirimbo ziri kuri album ye:

Muri album ziri kumvwa cyane muri Gospel kuri ubu, Tasha ni yo ya mbere kuri Billboard

Tasha Cobbs Leonard yari ageze aho acika intege, ariko yasubijwemo imbaraga na album ye yabaye iya mbere! Iyi foto yakoreshejwe muri album ye yise Tasha