Mu gihe hari injyana nyinshi zigezweho zikomeje kwigarurira imitima y’abakunzi ba muzika, bamwe mu bahanzi ba Gospel mu Rwanda bakomeje gushaka uburyo bwo gukora umuziki ufite umwimerere kandi ujyanye n’umuco nyafurika.
Muri abo harimo David Tuganimana uzwi nka David, wahisemo gukoresha injyana ya Rhumba nk’umuziki ushushanya Afurika ndetse anawukoresha mu kugeza ubutumwa bwiza ku bantu batandukanye.
Uyu muhanzi avuga ko yahisemo Rhumba kubera uburyo iyi njyana ifite amateka akomeye muri Afurika ndetse ikagira uburyo bwihariye bwo gukora ku mutima w’umuntu.
Yemeza ko nubwo abantu benshi basanzwe bayizi nk’injyana yo kwidagaduramo cyangwa y’urukundo, ishobora no kuba uburyo bwiza bwo kwamamaza ubutumwa bwa Kristo.
David Tuganimana yatangiye urugendo rwe rwa muzika ahagana mu mwaka wa 2005, icyo gihe atangira kuririmba nk’umuntu ukunda gusabana n’abandi no kwagura impano ye.
Avuga ko muzika yamufashije kubona inshuti nyinshi ndetse no kwegera abantu batandukanye. Gusa uko yagiye akura muri muzika, yaje kubona ko impano afite ikwiye no gukoreshwa mu kubaka imitima y’abantu no kubafasha kwegera Imana.
Yagize ati: “Rhumba ni injyana ifite imbaraga kandi ishobora gukurura urubyiruko ku Mana. Iyo ubutumwa bwiza buciye mu njyana abantu bakunda kandi bumva neza, bibafasha kubwakira mu buryo bworoshye.”
Indirimbo ye nshya yise “Nta yindi Mana” ni imwe mu ndirimbo akomeje gushyiramo ubutumwa bwo kwibutsa abantu ko nta yindi Mana ikwiriye kuramwa cyangwa kwizerwa uretse Imana yonyine.
Muri iyi ndirimbo, David agaragaza ko ubuzima bw’umuntu bugira icyerekezo igihe yiringiye Imana kandi akayigira ubuhungiro bwe.
Amagambo ari muri iyi ndirimbo agaruka ku rukundo rw’Imana, imbaraga zayo ndetse no ku mahoro umuntu abona iyo ayegereye. Ni ubutumwa bwubaka imitima y’abantu cyane cyane abari mu bihe byo kwiheba cyangwa gushaka icyerekezo cy’ubuzima.
David akomeje gusaba abahanzi nyarwanda kwagura ibitekerezo no guha umwanya injyana nyafurika aho kwigana cyane iz’amahanga. Avuga ko Afurika ifite umuco n’injyana bikomeye bishobora kugeza umuziki wayo ku rwego mpuzamahanga igihe byakoreshejwe neza.
Yagize ati: “Dukwiye gushyira imbere injyana zacu nk’Abanyafurika kuko ari zo ziranga umuco wacu. Rhumba ni kimwe mu birango bya muzika nyafurika kandi ishobora no gukoreshwa mu ivugabutumwa rikomeye.”
Uretse muzika, David azwi nk’umuntu usabana n’abandi ndetse ukunda kugirana ubucuti n’abantu batandukanye. Avuga ko gukunda abantu no kubegera bimufasha gusobanukirwa ubuzima banyuramo, bityo akandika indirimbo zifasha benshi kwegera Imana no kubona ihumure.
Mu gihe Rhumba Gospel ikomeje kugenda ibona abakunzi benshi mu Rwanda no hanze yarwo, David nawe akomeje gushyira imbaraga mu bikorwa bye bya muzika agamije guteza imbere iyi njyana no gukomeza kugeza ubutumwa bwiza ku bantu binyuze mu muziki.
Reba hano indirimbo “Ntayindi Mana” ya David, imwe mu ndirimbo zikomeje kugaragaza uburyo Rhumba Gospel iri kugenda ihindura isura y’umuziki wo kuramya no guhimbaza Imana.
Mu nkuru yacu itaha, tuzabagezaho izindi ndirimbo za David Tuganimana ndetse tunagaruke ku rugendo rwe muri muzika ya Rhumba Gospel.
Kandi ku bakunda gushyigikira iyi njyana nyafurika ikomeje kuzamuka, mushobora gufasha kuyimenyekanisha musangiza abandi iyi ndirimbo kugira ngo ubutumwa bwayo bugere kure.
Rhumba Gospel ikomeje kugira isura nshya binyuze muri David n’indirimbo ye “Nta yindi Mana"
RYOHERWA N’INDIRIMBO NSHYA "NTA YINDI MANA" YA DAVID
