Papa Innocent akaba umubyeyi wa Alicia na Germaine, yamennye amabanga mbere yo gusohora amashusho y’indirimbo “Ibendera” iri mu njyana ya Amapiano
Mu gihe abakunzi b’umuziki wa Gospel bakomeje kugira amatsiko ku mashusho y’indirimbo yabo nshya, Papa Innocent, se wa Alicia na Germaine akaba n’Umuyobozi Mukuru wa ABA Music, yamennye amwe mu mabanga akomeye ajyanye n’indirimbo nshya y’aba bavandimwe yitwa “Ibendera”, mbere y’uko isohoka ku mugaragaro.
Mu butumwa bwihariye yageneye Paradise, Papa Innocent yatangaje ko imirimo yose yo gutunganya indirimbo “Ibendera” yamaze kurangira ku kigero cya 100%, anashimira byimazeyo uruhare rwa buri wese wagize icyo atanga mu ikorwa ryayo.
Yagaragaje ko iyi ndirimbo yabaye urugendo rutoroshye, yuzuyemo imbogamizi nyinshi, ariko ko Imana yababaye hafi ikabafasha kuyirangiza neza.
Yagize ati: “Ni indirimbo ya mbere yadutwaye imbaraga nyinshi mu rugendo rwacu rwa muzika, ariko twabonye ukuboko kw’Imana mu ntambwe zose. Turayishimira kuko yaduhesheje isomo rikomeye ryo kwihangana no gukomeza kwizera.”
Papa Innocent yanatangaje ko indirimbo “Ibendera” izajya hanze ku wa Gatatu, tariki ya 14 Mutarama 2026, Saa Kumi n’Ebyiri z’umugoroba, asaba abakunzi ba Alicia na Germaine gukomeza kuyishyigikira kugira ngo ubutumwa buyirimo bugere kure.
“Ibendera” ni indirimbo ya Gospel iri mu njyana ya Amapiano, imwe mu njyana zigezweho kandi zikunzwe cyane n’urubyiruko muri iyi minsi. Nk’uko Papa Innocent yabisobanuye, bahisemo iyi njyana mu rwego rwo kwegera urubyiruko no gutanga ubutumwa bwiza bw’Imana mu buryo burimo umudiho n’ibyishimo.
Yagize ati: “Ibendera rifite ubutumwa bukomeye bwo guhumuriza abantu no kubibutsa ko ibendera rya Yesu Kristo ritazigera rimanurwa, n’iyo ibigeragezo byaba bikomeye gute. Ni indirimbo ifite injyana ya Amapiano, ku buryo n’abashaka kubyinira Imana bazayibonamo umunezero udasanzwe.”
Alicia na Germaine, bamaze kumenyekana mu ndirimbo zifite ubutumwa bwubaka imitima nka Urufatiro, Uriyo n’izindi.
Bakomeje kugaragaza ko bafite icyerekezo cyo gukoresha umuziki nk’igikoresho cyo kuramya Imana no kugera ku bantu benshi, by’umwihariko urubyiruko.
Abakunzi babo bakomeje kwitegura kwakira “Ibendera”, indirimbo itegerejweho kuba intambwe nshya mu muziki wa Gospel uhuza ukwizera n’injyana z’iki gihe.
Innocent
Alicia na Germaine
Umva amajwi y’indirimbo Ibendera kuri YouTube
