Mu butumwa yanyujije ku rukuta rwe rwa Telegram, Papa Francis ku wa 20 Gicurasi 2024 yagize ati: “Nihanganishije igihugu cya Irani ku bwo kubura Umukuru w’Igihugu, Perezida Ebrahim Raisi, na Minisitiri w’Ububanyi n’Amahanga Hossein Amir-Abdollahian baburiye ubuzima mu mpanuka y’indege ya Kajugujugu.”

Ubu butumwa Papa yanyujije kuri Telegram buri mu Cyongereza yabukomeje agira ati: “Dushyize mu biganza by’Imana ubugingo bw’abapfuye, kandi turasengera abari mu cyunamo ku bw’abo babuze, by’umwihariko abagize imiryango yabo. Ingabire za Roho Mutagatifu zibane n’iki gihugu kiri mu byago.”

Yifashishije n’izindi ndimi zitandukanye mu butumwa yanyujije ku zindi mbuga nkoranyambaga zirimo X yahoze ari Twitter, ariko muri rusange yagarukaga ku gusabira imbabazi ku Mana abaguye mu mpanuka y’indege, no gusaba ko Imana yabakira mu bayo.

Mu gitondo cya kare cyo ku Cyumweru, Perezida Raisi yari yagiye muri Azerbaijan mu muhango wo gutaha urugomero yari yatumiwemo na mugenzi we Perezida Ilham Aliyev. Uru rugomero ruri ku mugezi wa Aras ni urwa gatatu rwubatswe ku bufatanye bw’ibihugu byombi.

Ku Cyumweru tariki ya 20 Gicurasi 2024, Perezida w’imyaka 63 wa Irani Ebrahim Raisi, Minisitiri w’Ububanyi n’Amahanga Hossein Amir-Abdollahian, n’abandi banyacyubahiro bakomeye bo muri Irani baguye mu mpanuka y’indege, Isirayeli bamaze imyaka ibarirwa muri 45 ari abanzi kuva mu wa 1979 ishyirwa mu majwi.

Ibitangazamakuru bya Leta byatangaje ko amashusho yavuye kuri rubuga yerekanaga ko kajugujugu yakozwe na Leta zunze ubumwe za Amerika Bell 212 yagonze umusozi, nubwo nta jambo ryigeze rivugwa ku cyateye iyi mpanuka.

Papa Francis yihanganishije imiryango y’ababuze ubuzima, asabira ababubuze kuruhukira mu mahoro, ndetse Imana ikabakira mu bayo.

Perezida wa Irani yaguye mu mpanuka y’indege ya Kajugujugu

Papa yihanganishije Irani ku bwo kubura Perezida