Ku wa 28 na 29 Ukwakira 2023 korali Rangurura yabateguriye igiterane kizahuza amakorari atandukanye yo mu mujyi wa Kigali dusangamo Sayuni yo ku itorero rya Cyahafi ndetse na Siloam yo kuri ADEPR Kumukenke.

Iki giterane kizaba kirimo n’abavugabutumwa bakunzwe nka Habumuremyi Jean Paul na Nyagasaniribuka Loti. Umuyobozi w’iki giterane akaba na Mwalimu ku itorero ADEPR Biryogo by’umwihariko akaba ari umuririmbyi wa korali Rangurura.

Kizabera kuri ADEPR Biryogo guhera ku wa Gatandatu saa munani z’umugoroba hamwe na korali Sayuni n’umuvugabutumwa witwa Ev. Habumuremyi Jean Paul. Ku cyumweru bazakomezanya na Siloam hamwe n’umuvugabutumwa witwa Ev. Nyagasaniribuka Loti.

Iyi Korali Rangurura yavutse mu mwaka 1987 itangizwa n’abana bo mu miryango ibiri yasengeraga mu Biryogo, umuryango wo kwa Karaveri ndetse n’umuryango wo kwa Pasiteri Athanase mu cyumba cyakoreraga kwa Karaveri, nyuma cyaje kwimukira kwa Pasiteri Edizo n’abandi bazaga ndetse n’abakizwa bagendaga biyongera mu cyumba iyi korali igenda yaguka.

Haje kuzamo abaririmbyi bo muri Ebenezer bakoreraga Camp Kigali, nyuma Rangurura bakomereza mu cyumba cyo mu Gakinjiro i Nyarugenge. Ububyutse buri Nyarugenge mu cyumba cyo kuwa 3 kugeza n’ubu, korali Rangurura yabigizemo uruhare. Nyuma baje gufungura umudugudu mu Biryogo ku wa 01 Nyakanga 2007.

Korali Rangurura yagiye ivuga ubutumwa hirya no hino nubwo yabaga iri muri icyo cyumba n’i Nyarugenge mu Gakinjiro ntiyaburaga kugenda hirya no hino mu gihugu. Yagiye ikomeza gukora ubu ifite indirimbo z’amajwi n’amashusho, alubumu 3, ariko alubumu 2 ni zo ziriho amashusho.

Paradise.rw yaganiriye na Ev. Maombe Theogene mwalimu wa ADEPR Biryogo agira ati: "Twateguye igiterane cy’ivugabutumwa kugira ngo dukomeze kubwira abantu ubutumwa bwiza kuko twabonye ko Yesu ari ubwugamo ku wamuhungiyeho.

Niyo mpamvu twakise "Ubwugamo" ndetse no kugira ngo abari badaherutse Rangurura bayibone kandi intego nyamukuru ni ukugira ngo ubutumwa bwiza bugere Hafi na kure".

Umuyobozi mukuru wa korali Rangurura, Nsengiyumva Dennis, yahamagariye abo mu mujyi wa Kigali, inshuti, abaterankunga by’umwihariko abo muri paruwasi ya Muhima ko bazaza kwifatanya nabo muri iki giterane bateguye cyo kwamamaza ubutumwa bwiza. Kwinjira ni ubuntu.

Umuyobozi mukuru wa korali Rangurura, Nsengiyumva Dennis

Ev. Maombe Theogene mwalimu wa ADEPR Biryogo

Rangurura yateguye igiterane "Ubwugamo"