Ku mugoroba w’uyu wa Gatatu ni bwo bageze i Burundi. Bitabiriye igitaramo "Yangiriye neza Concert" kizaba kuwa Gatanu tariki 23/12/2022 kuri Jardin Public. Iki gitaramo gitegerejwe n’abarundi benshi bitewe n’ubuhanga bw’aba baririmbyi ukongeraho no kuba batarumiye Jamesna Daniella.

David Tresor, umuhazi ukomeye utuye muri Australia ariko ukomoka i Burundi, ni umwe mu bafitanye amateka maremare na Redemption yatumiye James na Daniella. Yanditse kuri Facebook ati "Redemption Voice twarakoranye muri Concert Yanjewe ya mbere yakoze Odeon Palace
Barashoboye gukora neza cane rero Uko imyaka igenda niko bagenda bakora neza bishimishije.

Ku myaka 15 muri mu gikorwa sikintu coroshe, nubuntu bw’Imana. Vyukuri Yesu Yarabagiriye neza. Imana izobane namwe le 23 Decembre bagenzi ndizera ko Abarundi bazobashigikira kandi bizoba vyiza cane. Imigisha myinshi".

Redemption Voice yateguye iki gitaramo icyitirira indirimbo yabo ikunzwe cyane yitwa "Yangiriye neza" imaze kurebwa n’abarenga ibihumbi 170 kuri Youtube. Aba baririmbyi bazwi mu ndirimbo zitandukanye zirimo na "Hallelujah" baherutse gukorana na Apotre Apollinaire.

James na Daniella bazava muri iki gitaramo cy’i Burund bahita baza i Kigali mu gitaramo cy’imbaturamugabo batumiwe na Israel Mbonyi, kizaba kuri Noheli tariki 25/12/2022 muri BK Arena. Kizaririmbamo Mbonyi, James na Daniella, Danny Mutabazi na Annette Murava.

Ni igitaramo Israel Mbonyi azamurikiramo Album ebyiri amaze igihe ari gutunganya. Izo Album zije zisanga izindi 2 yari kumurika mu bihe bishize, akagomwa mu nkokora na Covid-19. Kuri uyu wa Gatatu, Mbonyi yabwiye abanyamakuru ko iki gitaramo yacyiririye izina rye "Mbonyicyambu" kubera ko Imana yamubwiye ko izamugira "Icyambu".

Yagize ati “Ni ubuhamya. Imana impamagara yarambwiye iti ’nzakugira icyambu cy’abantu benshi ku Isi. Sinari nzi icyo bisobanuye ariko naje kumenya icyo bisobanuye.”

Israel Mbonyi afite Album enye: Iya mbere yitwa "Number One" yasohotse mu 2014, iya kabiri yitwa "Intashyo" yageze hanze mu mwaka wa 2017, ya gatatu yitwa "Mbwira" yagiye hanze mu mwaka wa 2019 naho iya kane yitwa "Icyambu" ari nayo azamurika kuri Noheli mur BK Arena.

James & Daniella ubwo bari bageze i Bujumbura

Bakiriwe n’itsinda rigari

I Burundi hagiye kubera igitaramo gikomeye

James na Daniella bazaririmba muri iki gitaramo

RYOHERWA N’INDIRIMBO "YANGIRIYE NEZA" YA REDEMPTION VOICE