Mu gihe umuryango nyarwanda ukomeje guhura n’ibibazo bitandukanye, harimo amakimbirane mu bashakanye n’izamuka ry’umubare w’abatandukana, hateguwe Family Legacy Conference, inama igamije gusubizaho indangagaciro z’umuryango no gufasha abashakanye kongera kwiyubaka.

Iyi nama izaba ku wa 29 Werurwe 2025, guhera saa munani (2:00PM), muri Crown Conference Hall – Gishushu, ikazaba ifunguye ku bantu bose kandi nta kiguzi cyo kwinjira.

Family Legacy ni iki, kandi igamije iki?
Nk’uko Pastor David Rutanga wayiteguye yabitangarije Paradise, iyi nama yateguwe nyuma yo kubona ko ibibazo bikomeje kwiyongera mu miryango biterwa n’ibirarane byirengagijwe n’uruhererekane rw’ibibazo bishingiye ku muryango.

Ni yo mpamvu hateguwe aya mahugurwa agamije kwigisha abashakanye uburyo bwo guhinduka abagore n’abagabo beza, kugira ngo bazasige umurage mwiza ku bo babyaye no ku bandi.

Ibintu bitatu iyi nama ije gukemura ni ibi bikurikira:
1. Gusobanukirwa inkomoko y’ibitera amakimbirane mu miryango.
2. Guhishurirwa ibisubizo ku bibazo bikomeye byugarije umuryango.
3. Kwiyemeza guhinduka no kuba umusemburo wo guhindura abandi.

Abateguye iyi nama ni ba nde?
Family Legacy Conference yateguwe n’itsinda ry’abantu bafite umutwaro wo kugarura amahoro n’umunezero mu miryango. Biyemeje gutanga ubushobozi bwose kugira ngo umuryango wongere kugira imizi ikomeye. Bikorwa ku bufatanye na Reactivation of Family Values Organization, igamije gusigasira indangagaciro z’imiryango.

Family Legacy izakomeza kubaho buri mwaka?
Nk’uko Pastor David Rutanga abivuga, Family Legacy si igikorwa gishingiye ku ngengo y’imari runaka cyangwa igihembwe cy’ihinga, ahubwo ni gahunda yateguwe nk’umusingi wo gutoza abashakanye gusiga umurage mwiza. Nyuma yayo, hazategurwa izindi nama zigenewe urubyiruko, abagabo, abagore ndetse n’ababyeyi bibana.

Imiryango yatumiwe, mwagendeye kuki muyitumira?
Abateguye iyi nama bahisemo abashakanye hashingiwe ku mpamvu ebyiri:
1. Abafite intimba n’agahinda kugira ngo bakire.
2. Abafite amahoro n’umunezero kugira ngo babisigasire, ndetse bafashe n’abandi.

Iyi nama ifitanye isano ite n’izamuka ry’augutandukana kw’abashakanye mu Rwanda?
Mu Rwanda, umubare w’abatandukana urimo kwiyongera, kandi ibi bifite aho bihuriye n’iyo nama. Nk’uko abategura Family Legacy babivuga, ibibazo biri mu miryango byatumye biyemeza gutanga umusanzu wo gufasha abashakanye kubona ibisubizo, kuko bahishuriwe ko bishoboka kandi bakizera impinduka nziza.

Abazatanga ibiganiro ni ba nde?
Family Legacy Conference izakira abavugabutumwa n’abaririmbyi batandukanye, barimo:
• Rev. Dr. Antoine Rutayisire – Umuvugabutumwa w’inararibonye.
• Pastor Cleophas Barore – Umushumba n’umwigisha.

• Pastor Jean Pierre Ndungutse – Azaba ayoboye amasengesho.
• Pastor Fidele Shinga – Azaba ari MC (uyobora igikorwa).
• Pastor Christophe Ngoga – Azafasha mu kuramya no guhimbaza.

Ahantu n’igihe bizabera
Crown Conference Hall – Gishushu
Ku wa Gatandatu, 29 Werurwe 2025
Guhera Saa Munani (2:00 PM)
Kwinjira ni ubuntu, harimo n’aho guparika imodoka.

Family Legacy Conference ni umwanya udasanzwe wo kongera gukomeza umubano w’abashakanye no gushyira imbaraga mu muryango. Ni inama buri wese akwiriye kwitabira kugira ngo arusheho gusigasira umuryango we no kugira uruhare mu kubaka sosiyete nziza.

Uyu ni Pastor David Rutanga n’umugore we, akaba ari we wabiteguye

Nawe utumiriwe muri iyi nama igamije kubaka urugo rufite umurage mwiza