Ibi byatangajwe na Christian Abayisenga, umunyamakuru ukomeye muri Gospel, akaba ari no ku isonga mu itsinda riri gutegura igitaramo cya Jesca Mucyowera. Christian Abayisenga akorera Isibo Tv, ndetse akaba ari we ukora ikiganiro cya Gospel cyitwa Holy Room.

Mu mwaka wa 2024, ni bwo Emma Rwibutso yafashe umwanzuro wo gutangira umuziki wa Gospel mu buryo buhamye kandi bunoze, nk’umuhamagaro. Muri uru rugendo rushya, amaze gukora indirimbo eshanu ari zo: "Amazi meza", "Ubwiza wihariye", "Ishimwe", "Arasa n’Imana" na "Rukundo" yakoranye na Bosco Nshuti.

Ni umuhanzi w’impano ikomeye cyane, abitabiriye igitaramo cya Bosco Nshuti [kuwa 13/07/2025] baba abahamya. Icyo gihe Emma Rwibutso yarishimiwe bikomeye, biba akarusho ubwo yaririmbaga indirimbo "Rukundo" yakoranye na Bosco Nshuti.

Ubwo yashyiraga hanze amashusho y’iyi ndirimbo ye nshya yavuze ko yayanditse agamije kubwira abantu ko urukundo rw’Imana rwabonetse ari rwose Yesu Kristo rukajya ku musaraba rukatubambirwa kandi ruhanagura amarira abantu bababaye bakishima kandi uwizeye urukundo rw’Imana azabona ubugingo.

Ubuhanga bwe n’ubuhamya bwe bihura ngo mahwi, byatumye abategura igitaramo cya Jesca Mucyowera batangaza ko yakabaye aririmba muri iki gitaramo. Bisa nk’aho bagiye kubimuganirizaho cyangwa bakaba bakaba bababajwe n’uko aho iminsi igeze bitakunda ko bamutumira. Iki gitaramo kizaba kuwa 02 Ugushyingo 2025 muri Camp Kigali.

Jesca Mucyowera usabwa gutumira mu gitaramo cye Emma Rwibutso ni muntu ki?

Jesca ni umuririmbyi w’umuhanga akaba n’umwanditsi mwiza w’indirimbo za Gospel. Ni we wanditse ’Shimwa’ ya Injili Bora yamamaye mu buryo bukomeye. Kuririmba abikora agamije kuramya no guhimbaza Imana no kwagura ubwami bwayo. Ni umubyeyi w’abana 4 yabyaranye n’umugabo we Dr Nkundabatware Gabin bashakanye mu 2015.

Mucyowera Jesca yavuze ko igitaramo cye cya mbere agiye gukora "Restoring Worship Experience" gisobanuye kwaguka kw’umurimo w’Imana muri we, akaba yaragisabwe kenshi n’abakunzi b’ibihangano bye. Kizaririmbamo True Promises, Alarm Ministries, naho Apotre Mignonne agabure ijambo ry’Imana.

Uyu mubyeyi ukunzwe cyane mu muziki wa Gospel, yavuze ko bizaba ari amahirwe yo kubona Imana ikora ibitangaza. Yizeye ko Imana izakora ibikomeye kuri uwo munsi, asaba abantu kuzitabira kugira ngo bazasangire iby’Umwuka azaba yateguye.

Ati: "Ubutumwa natanga mvuga kuri ’Restoring Worship Xperience,’ ni ugusaba nkomeje cyane Abanyarwanda n’abakunzi ba Gospel muri rusange kuzitabira iyi ’concert’ kuko hazabaho gukora kw’Imana gukomeye. Ndahamanya na Mwukawera ko Imana izakora ibikomeye kuri uriya munsi."

Uyu muhanzikazi ugiye gukora bwa mbere igitaramo cye bwite, yavuze ko iki gitaramo cye ari igihamya cyo kwaguka k’umurimo w’Imana n’ivugabutumwa rinyuze mu ndirimbo. Ati: "Bivuze kwaguka k’umurimo w’Imana muri njye, n’impano y’ivugabutumwa riciye mu ndirimbo kandi biratanga icyizere ko bizahoraho."

Jesca Mucyowera amaze imyaka myinshi mu muziki, gusa kuva atangiye kuririmba ku giti cye hashize imyaka 5. Akunzwe mu ndirimbo zirimo: Jehovah Adonai, Amahitamo yanjye, Yesu arashoboye, Ntawuzankoma mu nkokora, Ariko ubundi ubwo uribuka, Barahirwa, Urera, Ikubambiye amahema, Ntazagutererana, Abaroma 5 n’izindi.

Jesca Mucyowera agiye kwandika amateka

Emma Rwibutso aherutse kuririmba mu gitaramo cyanditse amateka mu Rwanda

RYOHERWA N’INDIRIMBO NSHYA YA EMMA RWIBUTSO