Alicia na Germaine bashyize hanze amashusho y’indirimbo yabo nshya “Ibendera” yari amaze iminsi ategerejwe cyane, indirimbo ya Gospel iri mu njyana ya Amapiano ifite umudiho n’ubutumwa bukomeye.
Ku wa Gatatu tariki ya 14 Mutarama 2026, Saa Kumi n’Ebyiri z’umugoroba, abahanzi b’abaramyi Alicia na Germaine bashyize hanze ku mugaragaro indirimbo yabo nshya bise “Ibendera”, iri mu njyana ya Amapiano ikomeje gukundwa cyane n’urubyiruko.
“Ibendera” ni indirimbo igaruka ku butumwa bwo guhumuriza imitima no gushimangira ukwizera, yibutsa abizera ko ibendera rya Yesu Kristo ritazigera rimanurwa, n’iyo ibigeragezo byaba bikomeye gute. Ihuza amagambo y’ivugabutumwa n’umudiho utera ibyishimo, bigatuma uyumva wese ayisangamo ihumure n’umunezero wo kuramya Imana.
Mu mashusho yayo, “Ibendera” yagaragayemo udushya twinshi, aho hakoreshejwe Drone mu gufata amashusho yo mu kirere, hagaragaramo amafarasi, ndetse n’ababyinnyi b’abahanga bo muri Kaminuza y’u Rwanda, Ishami rya Huye, bitwa VOH Band Team.
Aba babyinnyi b’abakristo basengera muri Zion Temple bashimangiye injyana ya Amapiano mu buryo buhuje n’ubutumwa bwa Gospel. Ibi byose byatumye amashusho y’iyi ndirimbo agira umwimerere udasanzwe ugereranywa n’izo ku rwego mpuzamahanga.
Papa Innocent, se wa Alicia na Germaine akaba n’Umuyobozi Mukuru wa ABA Music ireberera umuziki wabo, yabwiye Paradise ko “Ibendera” ari imwe mu ndirimbo zabahaye isomo rikomeye mu rugendo rwabo rwa muzika.
Yagize ati: “Ni indirimbo yadusabye imbaraga nyinshi, ariko twabonye ukuboko kw’Imana mu ntambwe zose. Ubutumwa bwayo ni uguhumuriza no kwibutsa abantu ko ibendera rya Kristo rihora rihagaze.”
Alicia na Germaine, bamaze kumenyekana mu ndirimbo zirimo Urufatiro, Rugaba, Ihumure, Wa Mugabo, Uriyo na Ndahiriwe, bakomeje kugaragaza ko bafite icyerekezo cyo gukoresha umuziki nk’igikoresho cyo kuramya Imana no kwegera urubyiruko binyuze mu njyana z’iki gihe.
Nubwo ari abanyeshuri—Alicia yiga Ubuvuzi muri Kaminuza y’u Rwanda, Ishami rya Huye, naho Germaine akiga Literature, French na Kinyarwanda (LFK)—bashimangira ko umuziki bawufata nk’umuhamagaro, kandi ko bazakomeza kuwukora nta nkomyi.
“Ibendera” yitezweho kubageza ku ntambwe nshya mu muziki wa Gospel nyarwanda, igahuza ukwizera, umudiho n’ubuhanzi bugezweho, ikanagaragaza Alicia na Germaine nk’icyitegererezo cy’urubyiruko rukoresha impano yarwo mu guhesha Imana icyubahiro.
REBA AMASHUSHO Y’INDIRIMBO "IBENDERA" YA ALICIA NA GERMAINE KURI YOUTUBE
Alicia na Germaine bagaragara bari ku mafarasi mu ndirimbo "Ibendera"
Clapton Kibonge aherutse gutangaza ko akunda indirimbo za Alicia na Germaine
Alicia na Germaine bakomeje kwerekwa urukundo rwinshi mu muziki wa Gospel
