Mu buryo bw’amajwi, iyi ndirimbo yakorewe muri Beacon Studio naho amashusho ayoborwa ndetse atunganywa na Alain Gatera Junior. Yanditswe na Danny Mutabazi ari nawe wayoboye ikorwa ry’amajwi yayo afatanyije na TFS. Danny Mutabazi ni umwanditsi w’umuhanga, akaba yaremeje benshi barimo na Vestine na Dorcas amaze kwandikira indirimbo ebyiri.

Photo Grapher zigaragara muri iyi ndirimbo ikomeje kuryohera benshi, zakozwe na Gad & Nyatsa, Lyrics zikorwa na Didace Turirimbe, zishyirwa mu cyongereza (Translation) na Obededomu Frodouard naho ibijyanye na Promotion y’iyi ndirimbo biri mu biganza bya Paradise.rw.

Mu kiganiro yagiranye na Paradise.rw, umuyobozi wa TFS ireberera inyungu Nyinawumuntu Divine, Bwana Obededomu Frodouard yavuze ko "Urugendo" ari indirimbo yakabaye yarasohotse mu kwezi kwa 6 hagati, ariko ntibyakunze bitewe n’uko Nyinawumuntu ari umunyeshuri kandi bakaba bari bakiri mu bizamini.

Ati "Byashoboraga gutuma adashyira umutima ku Masomo, kandi intego yacu ni ukumufasha kurushaho gutegura ejo heza. Ariko kuba indirimbo isohotse ibizamini birangiye bizatuma abona akanya gahagije ko gutanga ibiganiro ku maradiyo atandukanye ndetse n’ama television.

Yakomeje avuga ko indirimbo "Urugendo" ari imwe mu ndirimbo nziza mu zo "mwumvise". Aragira ati "Ni indirimbo yandikanywe ubuhanga, inononsorwa neza, ikorerwa muri imwe muri Studio igezweho "Beacon" kandi n’amashusho yakozwe n’umwe mu ba producers b’abahanga bagezweho i Kigali. Ni indirimbo twasengeye cyane,..Ifite amavuta...Ibindi muzatubwira..."

Nyinawumuntu Divine ni umwe mu baramyi bafite icyerekezo muri Gospel kandi bakiri batoya dore ko ari umunyeshuri wiga mu mwaka wa gatanu w’amashuri yisumbuye ku kigo cya Camp Kigali aho yiga mu ishami ry’Amateka, ubukungu n’ibidukikije (HEG).

Yamenyekanye biturutse ku ndirimbo za Israel Mbonyi, Aline Gahongayire ndetse na Nshuti Bosco yakundaga gusubiramo binyuze ku mirongo ya YouTube itandukanye, by’umwihariko Umurage Community TV.

Abantu batandukanye barimo abanyamakuru ndetse n’abahanzi bafite amazina batangajwe n’ukuntu iyo mpano yaba yaratwikiriwe, bituma haboneka abantu bamufasha gukora indirimbo ya 1 yiswe Mbeshejweho.

Iyi ndirimbo yagizwemo uruhare n’umuyobozi wa TFS watangiranye nawe Urugendo yatumye atumirwa ku maradiyo atandukanye arimo Television y’u Rwanda aho abanyamakuru bayo barimo Juliet Tumusiime umukunda kubi ndetse na Becky Rocsi bahamya ko u Rwanda rubonye impano y’akataraboneka.

Ibi byashimangiwe n’abandi bantu batandukanye barimo Justin Belis Umunyamakuru wa Flash FM, Umuramyi Danny Mutabazi, Gedeon wa inyaRwanda.com ndetse n’abandi.

Ibi byatumye abantu batandukanye bifuza gukorana nawe, gusa ahitamo gukorana na TFS iyobowe n’uwamufashije kwinjira mu muziki ndetse bikavugwa ko amasezerano yasinywe, amajwi y’iyi ndirimbo ageze ku musozo.

Uyu muririmbyi wari usanzwe ari umutoza w’amajwi wa Worship Team yo ku ishuli yigaho ndetse akaba umuririmbyi wa korali Abihanganye ya ADEPR Muhima, yahise yakirwa muri Kingdom of God Ministries imwe mu matsinda akomeje kwandika amateka muri iki gihugu.

Indirimbo ye ya mbere kuva yinjiye muri TFS, yishimiw cyane, benshi bamurata amashimwe. Esperance yanditse kuri Youtube munsi y’iyi ndirimbo ati "Woooowww, nice song kbsa, Imana ibahe umugisha nukuri, kdi courage cyane, imbere ni heza kuber’Imana".

Niyo Peace ati "Hallelujah hallelujah hallelujah hallelujah hallelujah hallelujah hallelujah hallelujah Nice song kbs komeza uterimbere". Nyirangabe ati "Mbega indirimbo nziza ndafashijwe coulage Divine wacu komerezaho Nyagasani muri kumwe". Undi ati "Woooowww, nice song kbsa, Imana ibahe umugisha ni ukuri, kandi courage cyane, imbere ni heza kubera Imana".

Indirimbo Urugendo ya Divine yasohotse kuri uyu wa Gatanu

RYOHERWA N’INDIRIMBO "URUGENDO" YA DIVINE NYINAWUMUNTU