Aya mahugurwa yitabiriwe n’abapasiteri bo mu matorero atandukanye, abera hirya no hino mu gihugu. Abayitabiriye bahuguwe n’abaterankunga ba Comfort My People Ministry ari bo Pastor Walt Roberson n’umufasha we. Yabereye i Nyamata muri Bugesera, Gicumbi, Muhanga na Cyanika.

Mu butumwa bw’ishimwe Paradise yabashije kubona, umupasiteri wayitabiriye ariko utatangajwe amazina ye yagize ati "Mwiriweho neza mwene Data muri Kristo! Mfashe uyu mwanya ngira ngo ubwambere nshime Imana yabahamagariye umurimo wo kugabura ibyago;

Ariko nkaba ngirango mbivanye ku ndiba y’umutima wanjye nshimire Pastor Walter na Madame we, ndetse na Pastor Willy, ku bw’ubwitange buhambaye bagize bwo gusaba imitima y’ubwoko bw’Imana.

By’umwihariko ndabamenyesha ko nafashijwe n’inyigisho nziza Kandi nzima mwaduhaye, njye ubwanjye nari nkomeretse, ariko kubw’inkuru ya Yozefu twabwiwe, numvise mpumurijwe, Kandi byanteye gufata umwanzuro wo kubabarira, no gukomeza gutegereza Imana.

Ikindi n’uko mu bibazo byinshi mfite, namenye ko Uwiteka azakomeza kuntunganiriza ameza mu maso y’abanzi banjye. Icya nyuma ni ugushima kubwo imfashanyo yahawe abatishoboye. Uwiteka abahe Umugisha.

Undi ati "Mwiriwe? Amahoro y’Imana abane namwe? Mbere na mbere reka dushime Imana yabanye natwe mu mahugurwa meza twagize nongereho kubashimira uburyo mudahwema kudutekerezaho, mukaba umuyoboro wo kuduhuza na Pastor Wallet akaza kutugezaho inyigisho nk’izi mu by’ukuri hari aho zadukuye.

Icya mbere yatumye turushaho kongera kwizera ko Yesu ariwe gisubizo nanone yatwigishije uko tugomba kubana nabo twashakanye mbese njye byandenze sinabona uko mbivuga Imana yo mu ijuru Ibahe umugisha utagabanyije kandi ikomeze kubagurira imbago mu buryo bwose Amen".

Undi ati "Mwiriwe neza Pastor? Mwagezeyo amahoro. Mwarakoze cyane kubana natwe iminsi ibiri yose, kandi inyigisho mwaduhaye zabereye abantu benshi umugisha cyane. Mwarakoze cyane, muzagaruke vuba kandi. Murakoze cyane".

Umupasiteri wundi "Ahandi naho turabashimira mu izina ry’Itorero rya Byumba muri rusange abashumba banezerewe ku bw’inyigisho za Pastor Muzehe na Mama, Mukomeze kubadushimira batweretse ko tutari twenyine mu murimo wa Data. Mudusuhurize imiryango. Kandi Imana Izakomeze kubana namwe muri byose".

Nyuma y’amahugurwa y’abapasiteri, yabeye i Nyamata mu Karere ka Bugesera mu Ntara y’Iburasirazuba no mu bindi bice by’igihugu, Comfort My People Ministry n’abaterankunga bayo, basuye abarwayi mu bitaro bya Nyamata, bishyurira abarwayi bari barabuze ubwishyu bw’ibitaro.

Mu bahawe ubufasha n’uyu muryango harimo ababyeyi bibarutse mu minsi ishize. Umwe muri abo babyeyi yibarutse abana batatu b’impanga, akaba yari amaze ukwezi kose mu bitaro kuko atabashje kubona ubwishyu bw’ibitaro. Yaremewe na Comfort My People yamwishyuriye ibitaro!.

Matayo 25: 36 "Nari nambaye ubusa muranyambika, nari ndwaye muransura, nari mu nzu y’imbohe muza kundeba.’" Icyo ni cyanditswe cyagendeweho na Comfort My People Ministry, yiyemeza kubera umugisha abarwayi batandukanye bari bafite ibibazo bikomeye byo kubura ubwishyu.

Iki gikorwa cy’urukundo bagikoze nyuma y’amahugurwa bakoze y’abapastori b’amatorero atandukanye muri Bugesera ndetse no mu bindi bice by’igihugu. Abagize uyu muryango, bari baherekejwe n’abaterangunga babo aribo Pastor Walt Roberson n’umufasha we Britt Roberson.

Umuyobozi Mukuru wa Comfort My People Ministry, akaba n’Umuyobozi wa Teen Challenge mu Rwanda no mu Karere, Pastor Willy Rumenera, yatangaje ko bakoze ibikowa binyuranye by’urukundo kuko ari byo Yesu yasabye abigishwa be, kandi roho nzima itura mu mubiri muzima.

Yavuze ko basuye abarwayi batishoboye mu bitaro binyuranye mu gihugu. Yongeyeho ko basuye na Centre de Santé ya Cyanika mu Majyaruguru, bishurira abantu 16 ibitaro muri Cyanika kuri Centre de Santé yaho ndetse batanga matela ku batishoboye bagera kuri 30.

Pastor Willy Rumenera hamwe na Pastor Walt Roberson n’umufasha we Britt Roberson

Comfor My People yatanze ubufasha ku miryango itishoboye