Bikorimana Emmanuel wamenyekanye nka ‘Bikem Wa Yesu’ yinjiye mu muhamagaro mushya wo kuririmbira Imana, aho ubu yamaze gushyira hanze indirimbo ya Kabiri yo mu gitabo yasubiyemo yitwa ‘Bayoboke Mubyuke’ iyi ikaba ari indirimbo iboneka mu ndirimbo zo gushimisha Imana kuri Nimero ya 201.
Bikem Wa Yesu wasubiyemo iyi ndirimbo ni umusore ubarizwa mu itorero rya ADEPR Remera, akaba yaramenyekanye cyane binyuze mu biganiro bitandukanye akora kuri YouTube aho afatwa nk’umusesenguzi mwiza kandi ukunzwe n’abatari bacye, cyane cyane abakurikira Iyobokamana TV.
Bikem, nubwo yamenyekanye nk’umusesenguzi ariko kandi ntiyigeze ajya kure y’umuziki, kuko yanyuzagamo agacurangira abaririmbyi batandukanye, ateza impano z’abana imbere, asubiramo amakorasi ya kera, ndetse akaba ari n’umwarimu wa piano ku Isi hose, kuko yigisha gucuranga binyuze ku ikoranabuhanga (online).
Uyu muririmbyi uririmba neza injyana ya Country Music, yongeye gushimangira ko mu myaka itanu iri imbere, Abakristo bazaba bazi neza indirimbo zo mugitabo basobanukiwe namateka yazo kugirango barusheho gufashwa nazo.
Afite icyifuzo ku ndirimbo zo mu gitabo
Bikorimana Emmanuel avuga ko iyo yitegereje akenshi asanga izi ndirimbo Abakristo benshi baziririmba batazizi, akenshi bakaziririmbira mu kigare ariko ntibakire impinduka zo mu mwuka kuko batariho mu buzima bw’indirimbo baba baririmba.
Ati “Niyo mpamvu nifuje gutanga umusanzu wanjye wo kwigisha no guhishura amateka y’izi ndirimbo, ku buryo umuntu azajya aririmba indirimbo azi neza impamvu y’iyo ndirimbo, azi uwayanditse ,n’ibihe uwayiririmbye yari arimo. Icyo gihe nituririmba indirimbo tuzi inkomoko yayo bizajya bituma tuyiririmbisha umutima kuruta kumva gusa umudiho wayo n’uburyohe bw’ijwi.”
Bikem wa Yesu yashyize hanze indirimbo yo mu gitabo "Bayoboke Mubyuke"
Ryoherwa n’Indirimbo "Bayoboke mubyuke" yasohokanye n’amateka yayo
