Abahanzi mu ndirimbo zamamaza Ubutumwa Bwiza, bakaba umugabo n’umugore bakora nk’itsinda, Patrick na Tracy, nyuma y’amezi arenga arindwi batumvikana mu ndirimbo nshya bashyize hanze iyo bise "Imirimo Yawe (Irivugira)".

Iyi ndirimbo yakiriwe neza n’abakurikira ibikorwa by’aba bahanzi ndetse n’abakunda indirimbo zamamaza Ubutumwa Bwiza muri rusange, yasohotse kuri uyu wa 13 Nzeri 2024, ikaba isohotse nyuma y’iyitwa Niryubahwe yasohotse ku wa 1 Gashyantare uyu mwaka.

Amajwi yatunganyijwe n’uwitwa Sammy Pro, ahuzwa kandi anonosorwa na Nic Pro, mu gihe amashushyo yayo yatunganyijwe na Musinga usanzwe ubatunganyiriza amashusho y’indirimbo zitandukanye harimo na Niryubahwe yabanjirije Imirimo Yawe (Irivugira).

Muri iyi ndirimbo bagaruka ku bikorwa Imana ikora ku manywa na nijoro ibikorera abantu, kandi abenshi bemeranyije n’aba bahanzi na bo batanga ubuhamya bwabo ahatangirwa ibitekerezo kuri iyi Ndirimbo Imirimo Yawe (Irivugira).

Ubusanzwe Tracy Agasaro yari umunyamakuru wa RBA, Rene Patrick ari umuririmbyi w’indirimbo zo kuramya no guhimbaza Imana. Aho basezeraniye kubana akaramata ku wa 04 Ukuboza 2021, batangiye kuririmba nk’itsinda, ubu bakaba bamaze kugira indirimbo nyinshi kandi bajyana no mu bitaramo bitandukanye batumirwamo.

Mu ndirimbo bakoze bari kumwe zigakundwa cyane harimo iyo bise Jehovah yasohotse ku wa 2 Nzeri 2023, iyi ikaba indirimbo yahinduye amateka y’umuziki wabo igatuma barushaho kumenyekana, kuko ari yo bafite yarebwe inshuro nyinshi kugeza ubu, kandi na mbere Patrick akora umuziki wenyine ku giti cye nta ndirimbo yabashije kugera kuri uru rwego. Kerese iyi bise Imirimo Yawe (Irivugira) nikuraho ako gahigo kayo.
Umva indirimbo nshya ya Rene Patrick na Tracy