Mu gihe impaka ku buzima n’amateka y’abaturage ba Armenia muri Nagorno-Karabakh zigikomeje, amakuru mashya yagaragaje ko insengero ebyiri zikomeye za Gikristo zasenywe burundu mu mujyi wa Stepanakert, ibintu byakuruye impungenge n’akababaro ku bakurikiranira hafi ibijyanye n’umurage w’umuco n’iyobokamana.
Amashusho yafashwe n’icyogajuru yemeje ko Holy Mother of God Cathedral, rumwe mu nsengero zikomeye muri uwo mujyi, rwasenywe. Iyi kiliziya yatangiye kubakwa mu 2006, yegurirwa Imana mu 2019, ndetse mu bihe by’intambara yabaye ubuhungiro bw’abaturage bari bahunze ibitero.
Si yo yonyine yasenywe, kuko na Church of St. Jacob, urundi rusengero rwari rufite amateka akomeye, na rwo rwakuweho burundu, hamwe n’amabuye y’ingenzi yari aruzengurutse yafatwaga nk’ibimenyetso by’umuco wa Gikristo.
Ubuyobozi bwa Caucasus Muslims Board bwemeje ko izo nyubako zasenywe ku bushake bwa Leta, buvuga ko zari zubatswe mu buryo bunyuranyije n’amategeko mu gihe Armenia yari ifite ububasha kuri ako gace. Buvuga ko gusenya izo nsengero “bidakwiruye gufatwa nk’isenywa ry’umurage w’umuco cyangwa iyobokamana.”
Abayobozi bamwe muri Azerbaijan bagaragaje ko abaturage basubiye muri uwo mujyi ari bo basabye ko izo nyubako zivanwaho, bavuga ko zitari zihari mbere y’icyo bise “igihe cy’igaruriro.”
Ku rundi ruhande, ubuyobozi bw’itorero rya Armenia, Mother See of Holy Etchmiadzin, bwashinje Azerbaijan kuba iri gukora igikorwa cyateguwe kigamije gusenya ibimenyetso byose by’umuco wa Gikristo w’Abanya-Armenia muri ako gace.
Umuyobozi w’itorero muri ako karere yavuze ko ibi bikorwa bigaragaza umugambi wo “gusiba burundu amateka n’uruhare rw’Abanya-Armenia muri Nagorno-Karabakh,” ibyo bise nka Jenoside yibasira umuco.
Hari n’abandi bayobozi bagaragaje ko gusenya izo nsengero bidahuye n’imvugo ya Azerbaijan ivuga ko ari igihugu cyubaha amadini atandukanye, aho bavuga ko insengero, imisigiti n’amasinagogi bishobora kuba hamwe.
Bamwe mu bayobozi mpuzamahanga bagaragaje ko ibi bikorwa bidakwiye gufatwa nk’ibisanzwe. Hari ababyise “jenoside y’umuco,” bashimangira ko nyuma yo kwirukana abaturage, gukuraho ibimenyetso by’amateka yabo ari indi ntambwe yo gusiba burundu umwirondoro wabo.
Gusenya izi nsengero bikomeje gutera impungenge ku hazaza h’umurage w’umuco muri Nagorno-Karabakh, ndetse bikaba byongera ubukana mu mubano usanzwe wuzuyemo amakimbirane hagati ya Armenia na Azerbaijan.
Mu gihe impaka zigikomeje, ikibazo gikomeye gisigaye ni iki: ese aya mateka azibagirana burundu, cyangwa hazaboneka inzira yo kurinda no gusigasira umurage w’umuco w’ako karere?
