Polisi iri gukora iperereza ku nkongi y’umuriro yangije bikomeye kiriziya iherereye muri Arizona mu kwezi gushize, bakeka ko yaba yaratewe n’ubugizi bwa nabi.
Kuri uyu wa 19 Ugushyingo 2024, Polisi yasohoye amashusho agaragaza ukekwaho icyaha afatwa na camera za kiriziya mu ijoro inkongi yabereyeho.
Kiriziya ya St. Anthony of Padua Catholic Church iherereye i Casa Grande yangijwe bikomeye n’umuriro ku itariki ya 18 Ukwakira 2024, bituma Abakirisitu bayo basengera mu kigo cy’imiryango (community center) aho gusengera muri kiriziya yabo.
Polisi y’i Casa Grande yashyize ku rukuta rwa Facebook amashusho yakuwe muri camera z’umutekano ku wa Gatandatu agaragaza umuntu ukekwa, asohoka muri kiriziya nijoro inkongi yabereyeho.
“Turabinginze mudufashe kumenya uyu muntu,” ni ko polisi yatangaje. “Ku wa 18 Ukwakira 2024, inkongi y’umuriro yatewe ku bushake muri St. Anthony of Padua Catholic Church iherereye kuri 201 North Picacho Street. Iyo nkongi yatumye ibintu byangirika bikomeye muri kiriziya.”
Mu iperereza riri gukorwa, polisi ya Casa Grande iri gukorana n’Ishami rya serivisi z’umuriro muri Casa Grande hamwe n’Ikigo Gishinzwe Iperereza ry’Inkongi z’Umuriro, Ibiyobyabwenge n’Inzoga, Intwaro, n’ibindi (Bureau of Alcohol, Tobacco, Firearms, and Explosives).
Ku itariki ya 18 Ukwakira, umuntu utaramenyekana yatwitse St. Anthony, kandi kiriziya yatangaje ko nubwo inyubako yo hanze yangiritse byoroheje, igice cy’imbere cyakongotse bikomeye.
“Ahantu horoheje nk’aho abaririmbyi ba korali bahagararaga harakongotse burundu, igice gikuru cyasengerwagamo (sanctuary) cyangiritse cyane, ibisigaye mu nyubako byangizwa n’umwotsi,” ni ko kiriziya yatangaje.
“St. Anthony ni urugo rw’Abakirisitu Gatolika mu gihe cy’ibisekuru byinshi, ikaba kandi inshuti y’amatorero ya Gikristo yo muri ako gace. Nubwo inyubako ya kiriziya yubatswe mu 1960, paruwasi imaze imyaka igera hafi ku ijana.”
Padiri Ariel Lustan, umushumba wa St. Anthony, mu kwezi gushize yasabye abantu kwirinda guhwihwisa ku cyateye inkongi kuko iperereza ritararangira.
Mu Cyumweru cyakurikiyeho, abantu amagana bateraniye mu kigo cy’imiryango cya kiriziya kugira ngo bahasengere. Muri bo harimo Betty Zambrano, wabwiye 12News ko kumva ibyabaye byamukomereye. “Nararize ubwo nabimenyeshwaga, ngaruka mu rugo mbibwira umugabo wange, ndavuga nti ‘ibi birababaje.’” Yabivuze mu kiganiro n’umunyamakuru wo muri Phoenix, Arizona.
Musenyeri Edward Weisenburger wa Diyosezi Gatolika ya Tucson yatangaje ko “ababajwe cyane n’ibyangijwe n’iyangirika rikomeye rya kiriziya ya St. Anthony.”
Weisenburger, mu kiganiro na Catholic News Agency yagize ati: “Ikiranga Abagatolika ni uko aho dusengera hataba ari ahantu dusengera gusa. Ahubwo haba harimo ibijyanye n’isakaramentu, amazi y’umubatizo, ibikoresho byahawe umugisha byo gukoreshwa mu misa, ndetse n’amabwiriza aturuka mu isakramentu ritagatifu.”
Iperereza riracyakomeje ngo hamenyekane uwihishe inyuma y’inkongi ikomeye yabaye muri uru rusengero
