Abahanzi ba Gospel, Rugarama James uzwi nka James, umugore we Mukiza Daniella uzwi nka Daniella na John Singleton Byiringiro, bageze kure imyiteguro y’ibitaramo batumiwemo na AfroHub bizaba mu mpera z’Ukuboza.
Ibi bitaramo bya “A Night of Worship” byateguwe hagamije gufasha Abanyarwanda n’abandi batuye muri leta za Phoenix na Dallas kurangiza neza umwaka wa 2024, no gutangira uwa 2025.
Bisanzwe biba buri mwaka, bigategurwa na Sosiyete y’umuziki ya AfroHub isanzwe ifasha abahanzi Nyarwanda gutaramira muri Amerika no mu bindi bihugu. Muri uyu mwaka bizaba ku wa 22 Ukuboza 2024 mu Mugi wa Phoenix wo muri Leta ya Arizona. Nibahava, ku wa 25 Ukuboza 2024 bazakomereza mu Mugi wa Dallas muri Leta ya Texas.
Ernesto uri mu bashinze sosiyete ya AfroHub yabiteguye yagize ati “Ni ku nshuro ya Kabiri tugiye gukora ibi concerts, kuri iyi nshuro rero tuzakorana na James, Daniella na Singleton. Ni ibitaramo twise ‘A Night of Worship’ dusanzwe dukora buri mwaka.”
Nk’uko yakomeje abivuga, batumiye Singleton kuko mu mwaka ushize yari mu bagombaga kuririmba ariko ntaririmbe kubera ko yagize urugendo rwihutirwa agahita aza mu Rwanda. Icyo gihe ni we wenyine utarabashije kuza mu bari batumiwe, abandi bose bari kuri gahunda bararirimbye.
Ernesto yagize ati: “Ni yo mpamvu uyu mwaka twifuje ko yongera gukorana natwe.” John Singleton Byiringiro ufite ubumuga bwo kutabona, ni umuhanzi ubifatanya no gucuranga uba muri Leta Zunze Ubumwe za Amerika. Ni umwe mu bahanga mu gucuranga Guitar na Piano.
Azwi mu ndirimbo zinyuranye zirimo Rukundo, Akagezi na Iyo Utegetse, Ndashima n’izindi nyinshi, akaba yaravukiye mu Karere ka Rubavu mu Murenge wa Nyundo, mu Ntara y’Iburengerazuba.
James, umugabo wa Daniella yagize ati: “Ibi bitaramo tugiye gukorera muri Amerika, tugiye kubikora hagamijwe kuramya mu buryo burambuye mu ndirimbo Imana igenda idushyira ku mutima, no kubonana n’abakunzi b’umusaraba muri rusange.”
Imyaka ine irashize iri tsinda riri mu muziki wa Gospel. James na Daniella batangiye gukundana hagati ya 2008 na 2009. Mu 2015 biyemeje kubana nk’umugabo n’umugore, kuva icyo gihe bakora umuziki bari kumwe. Bazwi mu ndirimbo nyinshi cyane zageze ku mitima ya benshi zirimo iyitwa Mpa Amavuta, N’ubu ni ho Ndi, Isezerano n’izndi.
Guhurira na James na Daniella mu gitaramo kimwe bizatuma abazabyitabira bishima kurushaho kuko bazaba bari kumwe n’abantu bafite talents zihariye mu kuririmba.
John Singleton Byiringiro ufite impano nyinshi azabana na James na Daniella mu bitaramo muri Amerika
James na Daniella bari mu bafite indirimbo zageze kure cyane bazaba bari kumwe na Singleton mu bitaramo muri Amerika
