Africa for Excellence Mission [AFEM] ku bufatanye na Hotel Talents Pool, ikigo kizwiho gutanga amahugurwa mu bijyanye na Hospitality no gushakira abakozi amahoteli na za resitora, batangaje ko batangiye kwandika abantu bose bifuza kwihugura mu myuga itandukanye ibarizwa mu rwego rwa Hospitality.
Aya mahugurwa y’ingirakamaro yateguwe na Africa for Excellence Mission binyuze mu kigo cyayo cy’amahugurwa Hotel Talents Pool, mu nkunga ya Sangira, Friends of Rwanda,
Agamije guha urubyiruko n’abandi bose kuva ku basoje amashuri yisumbuye bifuza ubumenyi bubafasha kubona akazi cyangwa kwihangira imirimo mu rwego rwa serivisi, amahoteli na resitora, rumwe mu nzego zikomeje gutanga amahirwe menshi y’akazi mu Rwanda no hanze yarwo.
Mu mashami azatangwamo amahugurwa harimo:
Gutanga serivisi muri resitora no gukora ikawa [Restaurant Services and Barista]
Gukora cake n’imigati [Pastry and Bakery]
Room Division irimo House Keeping na Front Office, ndetse na Decoration
Culinary Arts [Gutegura amafunguro]
Care Giving [Kwita ku bana n’abageze mu zabukuru]
Event Management [Gutegura ibirori n’inama zitandukanye]
Abifuza kwiyandikisha muri aya mahugurwa y’amezi icyenda (9) bashobora guhamagara kuri nimero zikurikira bitewe n’aho bashaka guhugurirwa:
Musanze: 0789142967
Kigali: 0789087836
Nyamasheke: 0783198161
Butaro: 0788210251
Ubuyobozi bwa Africa for Excellence Mission [AFEM] ku bufatanye na Hotel Talents Pool, bwatangaje ko ishami rya Nyamasheke rifite umwihariko kuko amahugurwa azahatangirwa ku buntu, aho abazahugurwa bazacumbikirwa ndetse bagahabwa amafunguro.
Mu yandi mashami, abazahugurwa bazajya bishyura igice cy’amafaranga asabwa, mu gihe igice gisigaye kizishyurwa n’abaterankunga.
Ikindi cy’ingenzi ni uko abazitabira aya mahugurwa bazanahabwa amasomo ajyanye no kwihangira imirimo no gukorana n’ibigo by’imari n’amabanki, hagamijwe kubafasha gutangira ibikorwa byabo nyuma yo gusoza amasomo.
Ubuyobozi bwa AFEM bwashishikarije urubyiruko kwitabira aya mahugurwa, buvuga ko urwego rwa Hospitality rukomeje gutanga amahirwe menshi y’akazi ndetse n’iterambere ry’umuntu ku giti cye. Buti: “Karibu mu buzima bwa Hospitality, urahakenewe kandi iterambere ryawe rirahagutegerereje.”
Africa for Excellence Mission [AFEM] ni umuryango wa Gikristo washinzwe mu mwaka wa 2023 na Hotel Talents Pool iyobowe na Pastor Christian Gisanura.
Uyu muryango wiyemeje guteza imbere urubyiruko binyuze mu kubaha ubumenyi bw’imyuga no kubafasha gukura mu mwuga no mu mibereho yabo.
AFEM ifite intego yo guhindura imitekerereze y’abaturage ba Afurika, cyane cyane urubyiruko, mu rwego rwo kurwanya ubukene, ibyaha ndetse n’indwara zandurira mu mibonano mpuzabitsina.
Uyu muryango kandi ushishikariza urubyiruko kubyaza umusaruro imyaka yabo, imbaraga bafite n’ubwenge bwabo, birinda ibibarangaza birimo ibiyobyabwenge, ubusinzi n’izindi ngeso mbi zangiza ubuzima bwabo n’ejo hazaza habo.
AFEM ivuga ko ishaka gufasha urubyiruko gukoresha neza igihe cyarwo kugira ngo rubashe kwiyubakira igihugu, kwiteza imbere ndetse no guteza imbere imiryango yabo hashingiwe ku mpano, inzozi n’ibyo bakunda gukora.
Ubuyobozi bwa AFEM bwagize buti: “AFEM irahari kugira ngo ifashe abatishoboye cyane cyane abo mu bice bitandukanye by’igihugu, kugira ngo urubyiruko rudahunga icyaro rujya gushakira ubuzima mu mujyi, ahubwo aho ruri rubashe kuhiyubakira ubuzima no kubyaza umusaruro amahirwe ahari.”
