Ni umunsi wihariye ku Bayisilamu, aho biyiriza ubusa, bagasenga cyane, bagasaba imbabazi kandi bakiyegereza Imana, haba ku bari mu mutambagiro mutagatifu wa Hajj no ku bari mu bindi bihugu.

Umunsi wa Arafah ni umunsi w’ingenzi cyane mu idini ya Islamu, uba ku itariki ya 9 y’ukwezi kwa Dhul Hijjah, ukabanziriza Eid al-Adha.

Ufitanye isano n’ahantu hitwa Arafat hafi ya Maka, aho abajya gukorera Hajj bakahurira bagasenga, bagasaba imbabazi kandi bagatekereza ku Mana mu buryo bwimbitse.

Ku bakora Hajj, uyu ni umunsi w’ingenzi cyane kuko “guhagarara i Arafat” nanone ari yo Arafah ari inkingi ikomeye ya Hajj, ku buryo bivugwa ko Hajj ituzura utageze i Arafat. Ku batari muri Hajj, ni umunsi ukomeye wo kwiyiriza ubusa, gusenga no gusaba imbabazi.

Hadithi zigaragaza ko kwiyiriza kuri uyu munsi bishobora gutuma abantu bababarirwa ibyaha by’imyaka ibiri (iyabanje n’iyikurikira ku byaha bito), kandi no gukora du’a kuri uwo munsi bifite agaciro kadasanzwe.

Hadithi ni amagambo, ibikorwa cyangwa ibyo Umuhanuzi Muhammad (Imana imuhe amahoro n’imigisha) yavuze, yakoze cyangwa yemeye bigakorwa n’abandi, bikaba ari isoko rikomeye ry’amategeko n’inyigisho mu idini ya Islamu.

Nyuma y’uyu munsi, abakora Hajj bakomeza n’indi mihango irimo gutera amabuye no gutamba igitambo, bikajyana no kwizihiza Eid al-Adha ku isi hose.

Arafat ni umunsi w’amasengesho, kwicuza no gusaba imbabazi, ukaba ufatwa nk’umwanya udasanzwe wo kwegera Imana mu buryo bwimbitse kurusha indi minsi isanzwe.