Iyo kinamico yiswe “A Gay in a Manger” (Umutinganyi mu Muvure), ikaba yarateguwe n’urubuga rw’abanyeshuri baharanira uburenganzira bw’abaryamana bahuje igitsina (LGBTQ network) muri kaminuza. Muri iyo kinamico, Yesu agaragazwa nk’“Umwami w’Abakundana Bahuje Igitsina”, naho ababyeyi be bakitwa Mary na Jo, ari couple y’abagore babana.

Mu bisobanuro by’iyo kinamico byashyizwe ahagaragara mbere y’uko itambutswa, handitse ko “Mary na Jo bapakiye amabendera y’ubwibone (pride flags) bagafata urugendo rurerure bajya mu kabyiniro k’abahuje igitsina gakomeye kari hakurya y’Inyanja Itukura, kitwa Ijuru.”

Ibyo bisobanuro kandi bivuga ko “Umwamikazi Herode (aho kuba umwami) yumvise inkuru y’uko havutse Umwami w’Abakundana Bahuje Igitsina, atangira gutegura uko yamuhirika, kuko ari we wenyine wagombaga kuba ikigirwamana cy’ikirenga mu gihugu.”

Abakristo biga muri iyo kaminuza bavuze ko iyo kinamico ari igikorwa cyo guhemuka ku byera bya gikristo, kandi ko ari n’ivangura rikozwe ku Bakristo, kuko bavuga ko igikorwa nk’icyo kitari kwemerwa iyo kiza kuba gisuzugura imyemerere y’Abayisilamu.

Josiah Diamond, umunyeshuri w’imyaka 21 wahoze ari Umuyisilamu, yabwiye ikinyamakuru The Telegraph ko iyo kinamico ari igitutsi gikomeye ku myemerere ya gikristo. Ati: “Uku kwerekana ibintu si ugutukana gusa, ahubwo ni ugusuzugura mu buryo bukomeye kandi bubabaza abakurikiza iyo myemerere, kandi bikaba binyuranyije n’inyigisho zayo.”

Yakomeje agira ati: “Ntihakwiye kubaho itandukaniro hagati y’amadini ku bijyanye n’uburenganzira n’icyubahiro cyayo. Twatunguwe no kubona York St John ishigikira uburyo nk’ubu. Ndahamya ko mutari kwemerera Abayisilamu gukorerwa ibintu nk’ibi. Ibi ni ivangura rikozwe ku Bakristo.”

Ku rundi ruhande, ubuyobozi bwa kaminuza n’ishyirahamwe ry’abanyeshuri (Student Union) batangaje ko nta gikorwa bazakora cyo kwitambika iyo kinamico, bavuga ko iri mu rwego rw’ubwisanzure bwo gutanga ibitekerezo no kwihangira ibihangano bidasanzwe ku isoko.

Mu itangazo ryabo, bagize bati: “Turumva ko bishobora kubabaza abanyeshuri guhura n’ibitekerezo n’imyumvire bitandukanye n’indangagaciro cyangwa imyemerere yabo.

Ariko ubwisanzure bwo gutanga ibitekerezo, mu rwego rw’amategeko, ni inkingi ya mwamba mu mikorere ya kaminuza. Nyuma yo gusuzuma byimbitse, nta kimenyetso twabonye cy’uko iki gikorwa kinyuranyije n’amategeko cyangwa n’inshingano zacu.”

Bakomeje bavuga ko amategeko abuza amagambo ashishikariza urugomo, iterabwoba n’urwango, ariko ko atabuza amagambo ashobora kubabaza cyangwa kugora abandi mu marangamutima.

Bongeraho ko ari kaminuza yakira abantu b’amadini yose n’abatizera na gato, kandi ko atari inshingano yayo gucecekesha ibitekerezo byemewe n’amategeko n’iyo byaba bidahuje n’imyemerere ya bamwe.

Donna Smith, Umuyobozi Mukuru w’Ishyirahamwe ry’Abanyeshuri, yanze gutanga igitekerezo ku kibazo cy’uko byagenda iyo haramuka habayeho ikinamico isesereza imyemerere y’Abayisilamu, avuga ko icyo ari “igitekerezo gishingiye ku byashoboka gusa”, anongeraho ko nta dini na rimwe riri gufatwa ukundi kurusha irindi.

Iyi nkuru yakomeje guteza impaka zikomeye ku mbuga nkoranyambaga no mu banyeshuri, aho bamwe bashyigikiye ubwisanzure bw’ubuhanzi, abandi bakagaragaza impungenge ku kuba imyemerere ya gikristo iri gusuzugurwa mu izina ry’ubwisanzure bwo gutanga ibitekerezo.

Mu myemerere ya gikristo ishingiye kuri Bibiliya, nta na hamwe handitse cyangwa hagaragaza ko Yesu yari umutinganyi cyangwa “umugay”, kandi no kudashaka umugore ntibisobanura na gato ko umuntu aba ari umutinganyi.

Yesu yabayeho mu butumwa bwihariye bwo gucungura abantu, aho yitangiye umurimo w’Imana wose atabogamye ku buzima bwo gushaka cyangwa gushyingirwa, nk’uko Bibiliya ibivuga ko “yaje gukora ibyo Se yamutumye” (Yohana 6:38).

Muri Bibiliya, kudashaka byagaragajwe nk’impano ku bantu bamwe bagenewe umurimo wihariye (Matayo 19:12; 1 Abakorinto 7:7), si ikimenyetso cy’imyitwarire y’ubusambanyi. Bityo rero, kuvuga ko Yesu yari umutinganyi bishingiye gusa ku gutekereza kwa muntu, ntibishingiye ku kuri kwa Bibiliya cyangwa ku mateka yizewe ya gikristo.