Itorero rya Pentekote mu Rwanda, ADEPR, riri mu myiteguro yo kwizihiza umunsi mukuru wa Pentekote, by’umwihariko ibihe by’Amasengesho y’Ububyutse azamara iminsi icumi.
Aya masengesho azamara iminsi icumi azabamo no kwiyiriza ubusa, kuva ku wa 9 agere ku wa 19 Gicurasi 2024 mu matorero yose yo mu Rwanda, nk’uko ubuyobozi bw’iri torero bwabigaragaje ku rukuta rwabo rwa X (yahoze ari Twitter).
Aya masengesho azaba afite intego igira iti: “Kuzura Umwuka Wera no kuyoborwa na We,” ikaba ishingiye mu gitabo cy’Ibyakozwe n’Intumwa 1:8 hagira hati: “Icyakora muzabona imbaraga Umwuka Wera nabamanukira, kandi muzaba abagabo bo kumpamya i Yerusalemu n’i Yudaya yose n’i Samariya, no kugeza ku mpera z’isi.”
Ubuyobozi bwa ADEPR bwatanze itangazo rigira riti: “Mu rwego rwo kwizihiza umunsi mukuru wa Pentekote, Itorero ADEPR ryateguye amasengesho y’iminsi icumi azaba ku wa 9-19 Gicurasi 2024, akabera mu matorero yose. Aya masengesho azaba afite intego yo kuzura Umwuka Wera no kuyoborwa na We-Ibyakozwe n’Intumwa 1:8. Twese dufatanye kuyitegura.”
Abakristo bo mu itorero rya ADEPR, umunsi mukuru wa Pentekote ni umunsi bubaha bakawufata nk’uwabayeho ibitangaza bikomeye.
Mu mwaka wa 33 ubwo Abigishwa ba Yesu bari mu munsi mukuru wa Pentekote, umwuka wera wabamanukiye umeze nk’ibirimi by’umuriro, abari bari gusenga bose barawuzuzwa, ubaha kuvuga indimi zitandukanye bari gukoresha bigisha ubutumwa bwiza i Yerusalemu, i Yudaya n’i Samariya, no hirya no hino ku isi hose aho bari kubasha kugera, ndetse bahabwa n’impano zo guhanura n’izo gukora ibitangaza.
Abapentekote cyangwa aba ADEPR bo ni umwihariko kuko imyizerere yabo ishingiye kuri Pentekote, cyane ko banitirirwa uyu munsi, bivuze ko bizerera mu guhanura, kuvuga indimi no gukora ibitangaza, bakaba barushaho guhabwa izi mpano mu bihe bya Pentekote.
Pentekote wari umunsi mukuru w’Abisirayeli (Abayahudi), bakaba barizihizaga isarura ry’ibinyampeke, akenshi bikaba mu kwezi kwa Gicurasi uhuje amezi ya kera n’ay’ubu. Pentekote bifitanye isano n’iminsi 50, bamwe bakaba bahitamo gusobanura iri jambo Pentekote nk’iminsi 50 ibarwa kuva igihe Pasika yabereye.
Nyuma y’iminsi 50 Pasika ibaye, ni bwo Abayahudi basabwaga kwizihiza uyu munsi, ibyo bikaba biboneka mu Balewi 23: 15-16.
Ni byiza gusaba ububyutse ariko turebe ko tukigendera mubyo twigishijwe koko Yesu Kristo uko yari ari niko akiri cg Isi iratujyana aho ishaka natwe tugakurikira buhumyi
Ikirwa uburenganzira bwa muntu kitumazemo uburyohe bw agakiza
IBIHE BYIZA BENE DA! MUKIZWE ARIKO MURIMBURE