Mu gihe nibereye muri iki gikombe, noherejwe link y’indirimbo na nimpero ntazi, ngira amatsiko yo kuyumva mba nka wa wundi wagiye ku kibuga cy’indege inkuba igakubita akagira ngo ni indege imuzaniye fiance.

Mbabwije ukuri iyi indirimbo yarandondoye ndarondoreka. Natamgajwe no kwakirizwa n’ijwi riyunguruye rivuga riti "Umpe imbaraga, Yesu umwami wanjye, unkomeze Umutima, nyambika intwaro zawe, ntatsinzwe kugeza ndangije urugendo". Kuva icyo gihe, ahari intege nke ubu huzuye imbaraga. Alleluiah!

Amazina ye ni Mugabo Boris, umuhanga mu guhangira amahanga ndetse n’abahanga bahanga, agahanga indirimbo ziramya zikanahimbaza Imana.

Uyu namwise zahabu yari itwikirije amazi kuko iyo itwikuruwe amahanga arahurura, nyamara mbere itarahishurwa ngo imurikirwe Abisiraeli bayifataga nk’andi mabuye. Nagize amatsiko yo kumenya byinshi kuri we ndetse no ku ndirimbo nshya, nawe ambera umwana mwiza amara amatsiko.

Ni Boris MUGABO Nsanzabandi, iwabo w’umubiri ni mu gihugu cya Poland cyangwa se Pologne, akaba umunyarwanda utuye mu mujyi wa Bialystock.

Mu kiganiro yagiranye na Paradise.rw, yatangaje ko ari umunyempano mu kuririmba indirimbo zo kuramya no guhimbaza Imana wabivukiyemo dore ko igihe cye cyo mu bwana yakunze kuba mu makorali no mu matsinda yo kuramya no guhimbaza Imana, by’umwihariko mu itorero rya Zion Tample Muhanga Parish.

Mu mwaka wa 2020, byabaye ngombwa ko asezera ku nshuti n’abavandimwe akomereza ubuzima mu gihugu cya Pologne ku mpamvu z’amasomo, gusa akomeza kuba hafi y’umuziki. Mu mwaka wa 2021, yatangiye kugera ku ndoto ze zo mu bwana, aho yasohoye indirimbo yitwa "Yesu ni Umugabo".

Boris Mugabo arateganya gukora igitaramo cya mbere

Aganira na Paradise, Mugabo Boris yagize ati: "Inganzo yayo yaje ubwo nari nicaye ndi gutekereza kuba nakora indirimbo yo gushima ababyeyi ko bandeze neza aho ngeze nkaba ndi umugabo mpita nibuka icyanditswe kiri muri 1 Korinto 1:31..ngo uwirata yirate Uwiteka.

Nibwo nahise mvuga nti reka nandike indirimbo nziza ivuga ko Yesu ariwe MUGABO. Nkibitekereza, nahise mbona Melody nandika nifashishije ibyanditswe byera. (Ibyahishuwe 5:1; Gutegeka kwa 2,.28:13).. Ubutumwa bukubiyemo ni uko Yesu ari Umugabo watsinze urugamba,agapfa kubwacu NGO tubone yubuzima".

Nyuma yo gusohora iyo ndirimbo ikaba inyenyeri, yaje kwagura iyerekwa abona ko imbere ye umurimo ari mugari. Kuri ubu yasohoye indirimbo ye ya kabiri yise "Umpe imbaraga". Ubwo twamubazaga kuri iyi ndirimbo yagize ati: "Iyi ndirimbo ni isengesho ryo gusaba Imana imbaraga muri iki gihe cy’ubuhenebere, kugira ngo tubashe gukora icyo twahamagariwe."

Dore ibintu bitatu by’umwihariko bikubiye muri iyi ndirimbo

1.Ni indirimbo iririmbishijwe umutima: Iyi ndirimbo nziza, Mugabo Boris hamwe n’umukobwa umufasha bayiririmba ubona ibyo baririmba bibarimo. Yuje inkomezi, uyumva utentebutse ukumva ikubereye ibanga ryuzuye ibyiringiro bizima mu mutima.

2.Imyandikire y’umwimerere: Iyi ndirimbo iranditse pee!! Ubu dushatse twavuga ngo Ikaramu ya Boris irasengeye! Ifite amagambo y’umwimerere, nta bintu byo gushishura, mbese wagira ngo yanditswe Boris yaraye mu cyumba cy’amasengesho.

3. Iracurangitse pee! Iyi ndirimbo biragaragara ko mu kuyikora habayeho ubushishozi. Icurangitse mu buryo bugezweho, amashusho yayo ateye ubwuzu kandi ubona imiririmbire n’imicurangire ndetse n’imyandikire bijyanye (ibyo bita harmonization).

Uyu muramyi ufite iyerekwa rigari muri gospel yatangaje ko nyuma y’iyi ndirimbo ateganya gukora izindi ndirimbo nyinshi zuje ubutumwa bufasha abantu gusenga ndetse zuje inkomezi.

Boris uvuga ko aje gufatanya n’abandi baramyi ku geza Gospel Nyarwanda ku ruhando Mpuzamahanga no gushyira itafari ku byo bubatse, aratangaza ko akomeje gutunganya album ye izasohoka mu minsi iri imbere, kandi ikazaza imeze neza.

Dore amagambo agize iyi ndirimbo

Refrain:
Umpe imbaraga, Yesu Umwami wanjye ngukorere uko bikwiye,
Unkomeze UMUTIMA, nyambika intwaro zawe.
Mpagarare ntatsinzwe, kugeza ndangije urugendo.

1.Nkwiriye gukora imirimo y’uwantumye, Hakiri kare,bugiye kwira n’igihe umuntu atakibasha gukora,Kuko ubwami bw’Imana Atari amagambo,ahubwo ari imbaraga.
Nyigisha gukora,Nyuzuza umwuka wawe,kuko intege nke zawe Mwami Yesu ni nyinshi cyane,Ziruta kure imbaraga nyinshi zanjye

(Sub chorus).Umpe imbaraga Yesu umwami wanjye,ngukorere uko bikwiye,unkomeze UMUTIMA,Nyambika intwaro zawe,mpagarare ntatsinzwe,kugeza ndangije urugendo(*3)

2.Kuko itaduhaye umwuka w’ubwoba ahubwo yaduhaye umwuka w’imbaraga,kandi imbaraga za Yesu zangabiye byose, Niko nzirata intege nke zange, N’imbaraga Za Yesu zinzehoo,.,..kuko nshobozwa byose na Kristo umpa imbaragaaaaaaa (*3)

RYOHERWA N’INDIRIMBO ’UMPE IMBARAGA’ YA MUGABO BORIS