Iyi ndirimbo ifite ubutumwa n’imicurangire y’ibi bihe by’umunezero bya Noheri, yibanda ku rukundo, no gusangira mu muryango mugari.

Mu ndirimbo Merry Christmas O!, Yemi Alade agaragaza umwuka w’ibihe bya Noheli akoresheje injyana ye yihariye ya Afropop ivanze na highlife. Amagambo y’iyi ndirimbo arimo Icyongereza n’Ikiyoruba, yibanda ku gusangira (ubusabane), kugira ubuntu, no kwishimira ubuzima hamwe n’umuryango n’inshuti.

Indirimbo itangira itumirira abantu mu byishimo bya Noheli, aho Yemi aririmba ati:
“Narabatumiye bose / Twese twicaye ku meza / (buri wese n’icyo akunda)
Inyikirizo yayo iravuga ngo:

“Merry Christmas o, Happy New Year”(Noheri Nziza n’Umwaka Mushya Muhire)
itanga ubutumwa bw’umunezero ku isi yose, na ho amagambo nka Keresimesi odun ile (Noheli irageze) agaragaza ko kwizihiza Noheri ari umuco wabaye uw’isi yose.

Yemi kandi yibukije abantu kwigira muri ibi bihe kugira umutima wo gutanga agira ati:
“Niwitangira musaza wawe / Musaza na we azitangira mushiki we / Ibi ni ibihe byo gutanga / By’umwihariko byiza cyane / Imana, ni yo mpamvu y’ibi bihe.”

Indirimbo ijyanirana n’amashusho arimo ibishushanyo bivanze n’imitako y’ibirori bya Noheli, byerekana umunezero w’ibi bihe. Iyi video y’amashusho iha abakunzi b’indirimbo isura nyayo y’ibyishimo bya Noheli.

Mu gihe Noheli yegereje, Merry Christmas O! igiye kutwibutsa agaciro k’ibi bihe byo gusabana no kubabarirana. Ifite injyana yishimirwa na benshi kandi amagambo yayo yongera gushimangira ko ibyishimo nyabyo biva mu gusangira no kugaragarizanya urukundo.

Noheri yizihizwa ku wa 25 Ukuboza buri mwaka. Bamwe mu Bakristo bayizihiza, mu gitekerezo nyamukuru cy’uko ari bwo Yesu yavutse (itariki yashyizweho), mu gihe abandi bo bagendera mu kigare, bakishimana n’abandi nta cyo bitayeho.

Bose bahuriza ku kuba Noheri iba mu gihe cyiza, gituma umwuka w’urukundo urushaho kwiyongera, ndetse bagatekereza no ku izina Yesu, baba baryemera cyangwa bataryemera.
Paradise ikwifurije Noheli Nziza n’Umwaka Mushya Muhire!