William Ruto yategetse polisi kurasa mu maguru abigaragambya bose batemera inzira za Leta cyangwa bagaragaza ibikorwa byo gusenya ibikorwa remezo. Ni amagambo yaciye ibintu mu bitangazamakuru mpuzamahanga, aho benshi babifashe nk’ikimenyetso cy’uko Leta igiye kurushaho gukoresha igitugu.

“Ntibakwiye kubica, ariko babarase mu maguru bavunike bajyanwe kwa muganga mbere yo kujya mu nkiko,” — Perezida Ruto, ku wa 9 Nyakanga i Nairobi.

Imyigaragambyo yamenyekanye ku izina rya Saba Saba

Iyi myigaragambyo yiswe Saba Saba (bivuga tariki 7/7), yibutsa igikorwa cya politiki cyabaye ku wa 7 Nyakanga 1990, ubwo Abanyakenya basabaga uburenganzira bwo kugira amashyaka menshi.

Kuri iyi nshuro, abaturage barimo cyane cyane urubyiruko, basubiye mu mihanda bamagana: Izamuka ry’imisoro; ruswa yagaragajwe mu nzego za Leta; iyicwa n’ihohoterwa rya polisi; n’icyifuzo cy’uko Perezida Ruto yegura.

Imibare y’inshamugongo
Nk’uko bitangazwa na Kenya National Commission on Human Rights, abantu 31 barishwe ku wa 7 Nyakanga gusa, abandi 107 barakomereka harimo abarashwe, bamwe barimo n’abana. UNICEF yagaragaje ko harimo umwana w’imyaka 12 warasiwe mu rugo iwabo i Kiambu, hafi ya Nairobi.

Ibi byatumye umubare w’abishwe muri rusange ugera kuri 51 mu mezi abiri ashize.

Ese Abakristo barimo?

Nubwo nta kimenyetso cyeruye cyangwa inyandiko ishimangira ko imyigaragambyo itegurwa n’Abakristo ku mugaragaro, amakuru yizewe aturuka muri Nairobi agaragaza ko hari amatorero amwe yafunguye insengero ngo ahe ubuhungiro abahunga ihohoterwa.

• All Saints’ Cathedral i Nairobi ni rumwe mu nsengero zakiriye abahungaga imyuka ya gase ya polisi (tear gas), harimo n’urubyiruko rwinshi.
• Abapasiteri bake bagaragaye bazamura amajwi basaba ubutegetsi “kureka kurasa abaturage nk’aho ari abanzi b’igihugu.”

Ibi bigaragaza ko nubwo Abakristo batari mu biganza by’imyigaragambyo, hari uruhare ruto rw’ubutabazi n’ubuvugizi batangiye, bamwe banagenera abarwayi inkunga binyuze mu matsinda yo gufasha.

Perezida Ruto yabwiye abaturage n’abamurwanya ati: “Abashaka guhirika ubutegetsi badakoresheje amatora ni nk’abagize iterabwoba. Tuzahuza imbaraga tubarwanye.”

Ibi bije nyuma y’uko Minisitiri w’Umutekano, Kipchumba Murkomen, na we yari aherutse gusaba polisi kurasa abantu “bagerageza kwinjira muri za sitasiyo za polisi bafite imigambi mibi.”

Kenya ni kimwe mu bihugu bifatwa nk’intangarugero muri demokarasi yo muri Afurika y’Iburasirazuba, ariko ibikorwa nk’ibi bishobora gutuma abantu bibaza ku cyerekezo cya demokarasi. Nubwo abanyamadini batarafatwa nk’inkingi z’imyigaragambyo, uruhare rwabo mu guhuza abaturage no gusaba amahoro ruragaragara mu bikorwa bito.

Ese igihe kizagera aho Abakristo bagaragaza uruhare rugaragara mu rugamba rwo gusaba impinduka?
Ni ikibazo gisigaye mu mitima ya benshi. Ariko icyizere cy’abaturage gikomeje gucika, Ruto yirukanye hafi ya bose mu bagize Guverinoma ye, ariko kugeza ubu, imyigaragambyo ntiracogora

Abapolisi nta miyaga bari kurasa abigaragambya

Uyu yarebaga aho abigaragambya batwikaga imipine y’imodoka ku wa 7 Nyakanga