Mwimbaji wa Injili Titus Ezra Sambay ametangaza ibada maalum ya kumshukuru Mungu kwa miaka 38 ya huduma yake katika Kwaya ya Mamajusi, moja ya kwaya kongwe za Injili nchini Tanzania.
Sherehe hiyo ya shukrani itafanyika tarehe 30 Agosti 2026 katika Parokia ya Holy Trinity Moshi, Dayosisi ya Mount Kilimanjaro ya Kanisa la Anglikana Tanzania.
Katika ujumbe wake wa shukrani, Sambay alisema safari yake ya huduma haikuwa rahisi, kwani imejaa changamoto, majaribu na nyakati ngumu zilizomfanya wakati mwingine kufikiria kuacha huduma ya kwaya. Hata hivyo, alisema Mungu alimpa nguvu na uvumilivu wa kuendelea.
"Safari yangu ya huduma haikuwa rahisi hata kidogo. Nimekutana na vikwazo na majaribu mengi. Wakati mwingine nilitaka kuacha kwaya, lakini Mungu aliweka huduma na uvumilivu mkubwa ndani yangu. Alinipa nguvu na kuendelea kukuza kipawa nilichopewa," alisema Sambay.
Alieleza pia kuwa wimbo wake maarufu “Upendo Kuu la Yesu (Alilipa Deni Langu)” umekuwa na mchango mkubwa katika maisha na huduma yake, ukimpa nafasi ya kuwafikia watu wengi kupitia Injili.
"Wimbo huo umenipa heshima duniani na Mbinguni, lakini utukufu wote ni wa Kristo peke yake," alisema.
Sherehe hiyo inatarajiwa kuhudhuriwa na kwaya mbalimbali, waimbaji wa Injili, viongozi wa dini na waumini kutoka maeneo tofauti ndani na nje ya Tanzania.
Sambay amesema amewaomba watu mbalimbali waliokuwa na mchango katika maisha na huduma yake, akiwemo Yona Sonero, Rose Mhando, pamoja na viongozi wa Kanisa, kuungana naye katika siku hiyo ya pekee.
Aidha, alitumia nafasi hiyo kuwaomba radhi watu wote ambao huenda aliwakosea katika kipindi chake cha huduma.
"Huenda nimewakwaza watu wengi kwa namna moja au nyingine. Mimi ni binadamu tu, si mkamilifu. Naomba mnifungulie moyo na kunisamehe, na tuendelee kuishi kama ndugu katika Kristo," alisema.
Mamajusi Choir: Miaka 50 ya Huduma
Mamajusi Choir ilianzishwa mwaka 1975 ikiwa na waimbaji 11 pekee. Kwa sasa kwaya hiyo ina zaidi ya wanakwaya 86 na imekuwa miongoni mwa kwaya zinazoheshimika sana nchini Tanzania.
Katika historia yake ya miaka 50+, Mamajusi Choir imefanya huduma katika nchi mbalimbali ikiwemo Malawi, Jamhuri ya Kidemokrasia ya Kongo, Kenya, Uganda na Rwanda, ikihubiri Injili kupitia muziki.
Sambay amesema kuwa kwaya hiyo imepitia changamoto nyingi katika safari yake ya huduma. Miongoni mwa matukio yaliyowagusa sana ni ajali kubwa iliyotokea walipokuwa wakirekodi video ya wimbo “Upendo Kuu”, ambapo baadhi ya wanakwaya walijeruhiwa vibaya na yeye mwenyewe kuvunjika mkono.
"Tulikutana na jaribu kubwa sana, lakini Mungu alitulinda. Licha ya ukubwa wa ajali hiyo, tuliokoka na kuendelea na huduma," alikumbuka.
Kadri Mamajusi Choir inatimiza miaka 50 tangu kuanzishwa kwake, sherehe hii ya miaka 38 ya huduma ya Titus Sambay itakuwa nafasi ya kumshukuru Mungu kwa uaminifu wake, pamoja na kusherehekea mchango mkubwa wa kwaya hiyo katika kueneza Injili kupitia muziki kwa miongo kadhaa.
Sambay amewaomba watu mbalimbali waliokuwa na mchango katika maisha na huduma yake kuungana naye katika siku hiyo ya pekee.
