Ibyo Paradise izi kuri Miss Kalimpinya ni uko ari umwe mu byamamare birangwa n’indangagaciro za Gikristo ndetse akaba azwiho guca bugufi cyane yaba imbere y’abo azi ndetse n’aba atazi. Ni umwe mu bo ukwiriye gufatiraho urugero rwiza bitewe n’imico ye.

Ni umukristo muri Noble Family church ndetse abarizwa no muri Women Foundation Ministries. Tumuzi kandi nk’umwalimu w’ishuri ryo ku cyumweru mu itorero asengeramo. Aherutse kubatizwa mu mazi menshi, akaba yarabatirijwe muri Noble Family Church.

Nyuma yo Kwita Izina umwana w’ingagi aho yamwise "Impundu", Miss Kalimpinya w’imyaka 24 y’amavuko akomeje kugira ibihe byiza cyane birimo no kuba yagaragaye aganira muri Siporo Rusange yo ku Cyumweru tariki 03 Nzeri, yitabiriwe n’abarimo Madamu Jeannette Kagame.

Mu butumwa yanyujije kuri Twitter, Miss Kalimpinya yagaragaye ko yakozwe ku mutima no guhura no kuganira na Madamu Jeannette Kagame ubwo bari bahuriye muri siporo. Yashimiye Madamu Jeanette Kagame ku bwo gushyigikira no gutera inkunga umwana w’umukobwa.

Yashimiye kandi Ikigo cy’Igihugu cy’Iterambere kuba cyaramuhaye amahirwe yo Kwita Izina. Ati Kuri njye, "Kwita Izina bisobanuye icyubahiro no gushimira. Murakoze Kwita Izina, na RDB. Ndashimira by’umwihariko Nyakubahwa Madamu Jeannette Kagamae, warakoze kuduha imbaraga no kudushyigikira".

Ku wa 4 Nzeri 2023 nibwo Miss Kalimpinya Queen yasuye Parike y’Ibirunga agiye kureba umwana w’ingagi yise izina ‘Impundu’. Mu kiganiro na IGIHE nyuma yo gusura umuryango uvukamo umwana w’ingagi yise izina, Miss Kalimpinya yavuze ko ari ibintu bishimishije.

Ati “Ni iby’agaciro kuba narahawe amahirwe yo kwita umwana w’ingagi, igikomeye kurushaho noneho nanabashije kujya kureba umwana w’ingagi nise izina. Nibaza ko ayo mahirwe buri wese yayifuza. Ndabishimira Imana ndetse n’Ubuyobozi bw’Igihugu cyacu budasiba guhesha agaciro urubyiruko.”

Miss Kalimpinya ni we mukobwa wenyine uri mu mukino wo gusiganwa mu modoka mu Rwanda, umukino yinjiyemo mu 2019. Ni umukino watumye uyu mukobwa arushaho kwamamara cyane mu Rwanda no hanze yarwo.

Ku wa 14 Kamena, Umwongereza Lewis Hamilton ukina amasiganwa y’imodoka nto, Formula 1, yasangije abamukurikira kuri Instagram ifoto y’Umunyarwandakazi Kalimpinya Queen ari gukina amasiganwa y’imodoka.

Females In Sport isanzwe igaruka ku bagore baba muri siporo by’umwihariko iyo gutwara imodoka na moto, ni yo yari yabanje gusangiza abantu ifoto ya Kalimpinya, ivuga ko ari we “mugore wa mbere ukina Rally mu Rwanda.”

Queen Kalimpinya wabaye co-pilote imyaka itatu, mu mwaka ushize ni bwo yiyemeje gutwara wenyine, akora amateka yo kuba umugore wa mbere ukina Rally mu Rwanda.

Uyu mukobwa uherutse kwakira agakiza amasiganwa ya mbere y’imodoka yitabiriye atwaye imodoka ni Rwanda Mountain Gorilla Rally 2022, nubwo atabashije gusoza kuko imodoka yamutengushye hasigaye uduce tubiri muri 12 twakinwe icyo gihe.

Muri Werurwe 2022 yaje kwitabira “Sprint Rally All Star 2022” yakiniwe mu mihanda yo mu Karere ka Rwamagana anabasha gusoza ariko icyo gihe yari umushoferi wungirije Yoto Fabrice. Icyo gihe babaye aba kane anegukana igikombe cy’umukobwa witwaye neza mu isiganwa.

Kalimpinya kandi yitabiriye Isiganwa ‘Nyirangarama Sprint Rally’ ryakinwe muri Gicurasi 2022 nabwo iki gihe akaba yari umushoferi wungirije.

Huye Rally 2023 yabaye irushanwa rya kabiri Queen Kalimpinya yitabiriye nk’umushoferi mukuru cyane ko yari amaze igihe akina ariko ari umushoferi wungirije, icyo gihe, muri Werurwe, ni we Munyarwanda wabashije gusoza isiganwa mu gihe kandi yabaye uwa gatatu.

Ibi byiyongeraho ko mu isiganwa rya Nyirangarama Rally, ryabaye ku wa 11 Kamena 2023, Kalimpinya wari kumwe na Ngabo Olivier, yasoreje ku mwanya wa kabiri inyuma y’Umurundi Faida Philbert wabaye uwa mbere.

Miss Kalimpinya aherutse kubatizwa na Apotre Mignonne

Miss Kalimpinya yise ingagi izina Impundu

Ni umwe mu byamamare bicye bifite ingangagaciro za Gikrsto

Yagiriwe umugisha wo kuganira na Madamu Jeannette Kagame

Miss Kalimpinya yakoranye siporo na Madamu Jeannette Kagame