Umuhanzi Levixone uri ku ruhembe rw’abakunzwe cyane mu muziki wo kuramya no guhimbaza Imana muri Uganda, yaririmbye mu birori bikomeye byatorewemo Miss Uganda 2023.
Nyuma y’imyaka 3 badatora Miss Uganda, mu ijoro rya tariki 18 Werurwe 2023 ni bwo umukobwa witwa Hannah Karema Tumukunze yatorewe kuba Nyampinga w’Igihugu cya Uganda anegukana ikamba rya Miss Popularity mu birori byabereye i Kampala muri UMA Multi-Purpose Hall.
Mu bahanzi baririmbye muri ibi birori byari bihanzwe amaso na benshi, harimo ukora umuziki usingiza Imana, ari we Levixone unafite inkomoko mu Rwanda. Abandi baririmbye muri ibi birori ni abakora umuziki usanzwe ari bo Jackie Chandiru n’itsinda rya B2C.
Sam Lucus Lubyogo wamamaye nka Levixone arakunzwe cyane muri iyi minsi i Kampala. Mu Rwanda, wamugereranya na Israel Mbonyi. Levixone na Mbonyi bahuriye ku kuba bombi barakiriye mu bihugu byabo Don Moen - umuramyi nimero ya mbere ku Isi ubwo yahakoreraga ibitaramo.
Levixone ukunzwe cyane mu ndirimbo "Chikibombe" Ft Timeless Noel ari nayo yaririmbye mu birori bya Miss Uganda 2023, ategerejwe mu Rwanda mu gitaramo Kigali Jazz Junction kizabera muri Camp Kigali tariki 31.03.2023. Kwinjira ni 10,000 Frw ahanzwe, 15,000 Frw muri VIP, 35,000 muri VVIP na 250,000 Frw kuri Table y’abantu 8.
Levixone mu birori bya Miss Uganda 2023
Miss Uganda 2023 Hannah Karema Tumukunze
Miss Uganda 2023 hamwe n’ibisonga bye
Levixone ategerejwe i Kigali
Levixone azaririmba muri Kigali Jazz Junction
