Ubushakashatsi bushya bwagaragaje ko abagabo bagira uruhare rugaragara mu kurera abana babo bungukirwa n’impinduka nziza mu mikorere y’ubwonko, bikabafasha kongera ubushobozi bwo gutekereza, gufata ibyemezo no kubaka umubano mwiza n’abana babo.
Ubu bushakashatsi bwiswe “The Paternal Brain: Longitudinal Insights into Structural and Functional Plasticity and Attachment over 24 Weeks Postpartum” bwasohotse muri Gicurasi 2026 mu kinyamakuru cya siyansi Translational Psychiatry.
Abashakashatsi bakurikiranye abagabo 25 kuva abana babo bavuka kugeza ku byumweru 24 nyuma yo kuvuka, bagenzura impinduka zabaga mu bwonko bwabo mu bihe bitandukanye.
Ibyavuye muri ubu bushakashatsi byagaragaje ko mu byumweru bitandatu bya mbere nyuma yo kubyara, habaho igabanuka ry’igice cy’ubwonko kizwi nka gray matter mu bice byinshi by’ubwonko. Nyuma y’icyo gihe, ubwonko butangira kongera kwiyubaka no gukura mu bice bifasha umuntu gutekereza, gutegura ibikorwa no gufata imyanzuro.
Abashakashatsi bavuga ko ibyumweru bya mbere nyuma y’ivuka ry’umwana ari igihe gikomeye cyane mu guhinduka ku’ubwonko bw’umubyeyi w’umugabo.
Bagize bati: "Ibyo twabonye bigaragaza impinduka zikomeye mu mikorere no mu miterere y’ubwonko bw’abagabo nyuma yo kuba ababyeyi. Ibyumweru 6 kugeza kuri 9 bya mbere ni igihe cy’ingenzi cyane mu kwiyubaka k’ubwonko bwabo."
Nubwo abashakashatsi batashoboye kumenya neza impamvu nyamukuru itera izi mpinduka, bavuga ko bishoboka ko zituruka ku nshingano nshya zo kwita ku mwana no kubaka umubano wa hafi hagati y’umubyeyi n’umwana.
Bagaragaje kandi ko ibice by’ubwonko bifitanye isano n’urukundo rw’umubyeyi n’amarangamutima byahindutse ku buryo bugaragara, bigafasha umubyeyi kurushaho kwegera no kwita ku mwana we.
Ubu bushakashatsi buje mu gihe imibare igaragaza ko abana benshi bakurira mu miryango idafite ba se.
Imibare yo mu mwaka wa 2023 yerekana ko abana bagera kuri miliyoni 19 bafite hagati y’imyaka 0 na 17 baba mu ngo zitabamo ba se, yaba uwababyaye, ku mugore akaba atari kumwe n’uwo bashakanye.
Ubundi bushakashatsi bwakozwe mu 2013 bwagaragaje ko kubura uruhare rwa se mu buzima bw’umwana bishobora kugira ingaruka mbi ku mikurire ye y’amarangamutima n’imyitwarire.
Abashakashatsi basanze izi ngaruka zikomera cyane iyo umwana akuze adafite se kuva akiri muto, kandi zigaragara cyane ku bahungu kurusha abakobwa.
Ubwo bushakashatsi bwagaragaje kandi ko abana bakuze badafite se baba bafite ibyago byinshi byo kwishora mu ngeso mbi zirimo kunywa itabi, imyitwarire ishobora kubakururira ibibazo ndetse no gutangira ubuzima bw’ububyeyi cyangwa kubyara bakiri bato.
Abashakashatsi bavuga ko ibyavuye muri ubu bushakashatsi bishimangira akamaro k’uruhare rwa se mu buzima bw’umwana, ndetse bikerekana ko no ku babyeyi ubwabo, kwita ku bana babo bishobora kubafasha mu mikorere myiza y’ubwonko no mu mibereho yabo muri rusange.
