Itorero Jehovanis Prayer Family (J.P.S) / Beloya church ni itorero riherereye Kimironko mu izindiro munsi y’urusengero rwa ADEPR Kimironko bakaba bateguye ibikorwa bitandukanye birangajwe imbere no gutaha urusengero.
Kuri uyu wa 20 Nyakanga 2024, ni bwo itorero rya Jehovanis Prayer Family (J.P.S) / Beloya Church, ryateguye umunsi udasanzwe ukubiyemo ibikorwa byinshi harimo umuhango wo gutaha urusengero, kwimika abakozi b’Imana, kubatiza abizera bashya bamaze igihe bakurikirana inyigisho ndetse no gutaha ishuri ry’imyuga.
Iri shuri ry’imyuga kandi riteganijweko rizajya ryunganira abakirisitu bize bo muri iri torero badafite icyo bakora mu kubona akazi aha dusangamo imashini zo kudoda, mudasobwa ndetse na camera.
Bamwe mu bo muri iri torero bagiranye ikiganiro n’itangazamakuru, basobanuye neza umunsi wo kuwa Gatandatu ku wa 20 Nyakanga 2024. Subugabo Felicien Umunyamabanga Mukuru w’itorero Jehovanis Prayer Family (J.P.S)/Beloya church yavuze ko ari umunsi udasanzwe uzaba ukubiyemo ibikorwa byinshi byiza.
Yavuze ku mubano w’iri torero ndetse na Foursquare Gospel church iyobowe na Bishop Prof Dr. Fidele Masengo, avuga ko amufata nk’umubyeyi we mu buryo bw’Umwuka dore ko uyu mushumba ari na we uzayobora uyu muhango.
Pastor Aniset Nyemazi umukozi w’Imana mu itorero rya Jehovanis ndetse akaba ari umwe mu bakozi b’lmana bazasengerwa, yagize ati: "Jehovanis Prayer Family (J.P.S) / Beloya Church ni itorero rikiri rito ariko rifite icyerekezo cyiza ".
Subugabo Felicien yasabye abantu kuzitabira ibi bikorwa byose ku isaha ya saa tatu za mu gitondo kuko bazahakura ibifatika byinshi byiza dore ko iri torero rigira ibikorwa byinshi bitandukanye nko gufasha abatishoboye, kubishyurira ubwisungane mu kwivuza, n’ibindi bikorwa by’ubugiraneza bitandukanye.
lri torero rimaze kugira abayoboke basaga 400, rikaba rifite intego yo kubwiriza abantu ubutumwa bwiza, bagahindukira bagakurikira Yesu Kristo, kugira ngo nagaruka gutwara itorero azasange abantu biteguye.
Subugabo Felicien umunyamabanga mukuru w’itorero Jehovanis Prayer Family (J.P.S)/Beloya church ndetse akaba umwe mubagabo bazwi cyane ku izina rya Bill gate mu kibuga cy’ubucuruzi.
Munyaneza Ernest umujyanama wo mu itorero rya Jehovanis Prayer Family (J.P.S) / Beloya Church
Past. Aniset Nyemazi umukozi w’Imana mu itorero rya Jehovanis ndetse akaba Ari umwe mu bakozi b’lmana bazasengerwa
