Msanii mashuhuri wa muziki wa injili, Israel Mbonyi, amewatia mashabiki wake shauku kubwa baada ya kutoa ishara kwamba ana wimbo mpya kupitia mitandao yake ya kijamii.
Aliuliza, “Mnasemaje kuhusu wimbo mpya?”, jambo ambalo liliwafanya mashabiki wake wengi kuonyesha msisimko mkubwa.
Mara moja, ujumbe wake ulipokelewa kwa hamasa kubwa, huku wengi wakimsihi autoe haraka iwezekanavyo. Mashabiki wake walieleza kuwa wamekuwa wakingoja kazi mpya kutoka kwake kwa muda mrefu na wako tayari kuikaribisha kwa furaha.
Ingawa Israel Mbonyi bado hajafichua jina la wimbo huo wala tarehe ya kuutoa, mashabiki wake tayari wana matarajio makubwa. Muziki wake umekuwa na ushawishi mkubwa kwa watu wengi, si tu Rwanda bali pia katika mataifa mengine.
Tangazo hili linakuja wakati ambapo Israel Mbonyi pia anawania tuzo kubwa katika Trace Awards, ambapo ameteuliwa katika kipengele cha Msanii Bora wa Injili. Waandaaji wa tuzo hizi walihimiza watu kumpigia kura wakisema:
"Msanii mahiri wa nyimbo za injili, Israel Mbonyi, yupo kwenye kinyang’anyiro cha tuzo ya Msanii Bora wa Injili katika Trace Awards! Usisite kumpigia kura kwa nyimbo zake nzuri na zenye mafundisho makubwa!"
Uteuzi wake katika tuzo hizi ni uthibitisho wa jinsi muziki wake unavyoendelea kuwagusa watu wengi na kuleta mabadiliko chanya kwa wasikilizaji wake.
Kwa miaka kadhaa, Israel Mbonyi ameimarisha nafasi yake kama msanii wa juu wa injili, huku tamasha lake la kila mwaka, Icyambu Live Concert, likihudhuriwa na maelfu ya watu.
Mwaka wa 2024, alifanya tamasha lake katika BK Arena kwa mara ya tatu mfululizo, ambapo zaidi ya mashabiki 10,000 walijitokeza.
Mbonyi, anayejulikana kwa nyimbo maarufu kama Nina Siri, Nita Amini, na Icyambu, anaendelea kupanua mipaka ya muziki wake. Wakati mashabiki wake wakisubiri kwa hamu wimbo wake mpya, matarajio ni makubwa kuona ni jambo gani jipya atalileta kwenye muziki wa injili.
Israel Mbonyi pia anawania tuzo kubwa katika Trace Awards, ambapo ameteuliwa katika kipengele cha Msanii Bora wa Injili
