Iri tangazo ryatanzwe ku wa 28 Mutarama 2025, rifite intego yo kwimakaza ubwiza bw’ukuri no kuzirikana umwimerere w’ubwiza nyafurika.

Victor Yapobi, Perezida w’akanama gategura irushanwa, yasobanuye ko iri tegeko rishya rigamije kugaragaza ubwiza bw’umusatsi nyafurika. Abakandida bagomba kugaragaza umusatsi wabo w’ukuri, yaba ari muremure, mugufi, usokoje, cyangwa utondeye.

Ni ubwa mbere mu mateka y’amarushanwa y’ubwiza y’igihugu habaye impinduka nk’iyi, bikaba ari intambwe ikomeye mu bihugu bibamo amarushanwa y’ubwiza.

Uyu mwanzuro wafashwe bitewe no gufatira urugero kuri Marlene Kouassi, wegukanye ikamba rya Miss Côte d’Ivoire mu 2022, dore ko ahora yishimiye umusatsi we karemano mugufi.

Uretse kubuzanya ibisuko no kunyereza imisatsi, irushanwa ryahinduye bimwe mu bisabwa ku bakandida—rigabanya uburebure ntarengwa bwa metero 1.68 bugera kuri 1.67, ndetse rinazamura imyaka ntarengwa y’abitabira, iva kuri 25 igera kuri 28.

Irushanwa rya Miss Côte d’Ivoire 2025 riteganyijwe ku wa 26 Kamena, ariko iri tegeko rishya ryamaze guteza impaka zitandukanye.

Abaryishimiye baribonye nk’intambwe nziza yo kwimakaza ubwiza bw’Afurika, mu gihe abatavuga rumwe na ryo bavuga ko ribangamiye ubwisanzure bw’abantu mu kwihitiramo ibibanogeye.

Ibi bihuje n’ibyo amwe mu matorero yo mu Rwanda yahisemo, urugero nka ADEPR ibuzanya kwisukisha no kunyereza imisatsi ishingiye ku butumwa bwa Petero busaba Abakristo kuba abantu bahishwe mu mutima, batirimbisha ibyo kubohesha imisatsi n’ibindi. - 1 Petero 3:3

Kwisukisha no kunyereza imisatsi ntibyemewe ku wifuza kwitabira amarushanwa y’ubwiza muri Ivory Cost