Imibare y’abishwe n’ibiza mu Ntara y’Iburengerazuba n’iy’Amajyaruguru ikomeje kuzamuka. Abitabye Imana bamaze kuba 109. Barimo 95 b’Iburengerazuba na 14 bo mu Majyaruguru.

Ni nyuma y’uko mu ijoro ryacyeye haguye imvura nyinshi cyane yahitanye ubuzima bwa benshi muri izi ntara ebyiri ndetse ikangiza n’ibikorwa remeza nk’uko Guverineri Habitegeko François yabitangarije RBA.

Tariki ya 1 Gicurasi 2023, Ikigo gishinzwe Ubumenyi bw’Ikirere (Meteo-Rwanda), cyatangaje ko muri Gicurasi "hateganyijwe imvura iri hagati ya milimetero 50 na 200. Imvura iteganyijwe iri hejuru gato y’igero cy’imvura isanzwe igwa mu kwezi kwa Gicurasi mu bice byinshi by’Igihugu".

Minisiteri ishinzwe kurwanya ibiza mu nshingazo zayo, mu butumwa yanyujije kuri Twitter, yatangaje ko "Abaturarwanda barasabwa gushyira mu bwishingizi imitungo yabo hakiri kare;

Kwirinda kugenda mu mvura, hirindwa ko umuntu yakubitwa n’inkuba cyangwa agatwarwa n’imigezi yuzuye; Abatwara ibinyabiziga barasabwa kwitwararika, bakirinda kunyura mu mihanda yuzuye amazi".

Abanyarwanda barasabwa gushyira mu bwishingizi imitungo yabo hakiri kare