Itegeko “One Big Beautiful Bill” ryatanzwe na Perezida Donald Trump, bavuga ko rishobora kwica indangagaciro z’imibereho myiza, uburenganzira bwa muntu n’amahame y’iyobokamana.

Mu ibaruwa rusange yoherejwe ku Nteko Ishinga Amategeko y’Amerika (Senat), abarimo Cardinal Robert McElroy wa Washington D.C. na Rev. Gabriel Salguero wo muri National Latino Evangelical Coalition, basabye abasenateri kudashyigikira iryo tegeko kuko ryashyira mu kaga imiryango y’abimukira, rikagabanya inkunga y’ingoboka ku bakene kandi rigatesha agaciro uburenganzira bw’ibihugu bigize Leta Zunze Ubumwe z’Amerika.

Ibyo iryo tegeko rigamije byateje impaka

• Rigamije gushyiraho miliyari nyinshi z’amadolari zo gushyigikira gahunda yo kwirukana abimukira no kongera imiyoboro y’inkuta ku mipaka.
• Ritanga uburenganzira bwo gufata abantu b’imyemerere no kubinjirira mu nsengero, kuko ku nshuro ya mbere, ibigo bya Leta byakuye insengero ku rutonde rw’ahantu haba umutekano.
• Abayobozi b’amadini bagaragaje impungenge z’uko ibyo bizatuma abemera Imana batinya kwitabira ibikorwa by’amasengesho, ibintu byamaze gutangira kugaragara mu madini amwe.

Ingaruka ku mibereho y’abaturage

Iri tegeko rinateganya kugabanya serivisi z’ubuzima n’ubufasha mu biribwa, ibintu bishobora gushyira abaturage bakennye n’abashakisha ubuhungiro mu bukene bukabije, nk’uko iyi baruwa ibivuga ishingiye ku mibare yatanzwe n’Ibiro bya Budget by’Inteko (CBO).

Ikindi kivugwa ni uko iri tegeko rizavana umutungo mu maboko y’abakene 10% bakennye cyane mu gihugu, rikawushyira mu maboko y’abakire 10% bonyine, ibintu byamaganywe n’amadini nk’ibitubahirije ubutabera.

Imyanzuro y’abayobozi b’amadini

Bavuze bati: “Iri ni itegeko ryica ishusho ya Leta igendera ku ndangagaciro z’iyobokamana, ryigisha kwikubira no kubangamira abakene n’abashaka ubuhungiro.” Banavuze ko “Igihe AI izaba ifite ububasha bwose itagira amategeko ayigenzura, Leta izaba iri mu nzira igana ku butegetsi bushingiye ku bwikanyize n’iterabwoba.”

Abepiskopi Gatolika n’abayobozi b’Abalatino b’Abaporotesitanti banenze bikomeye itegeko rishya rya Trump ryo kugabanya inkunga y’ingoboka ku bakene