Titus Ezra Sambay, mwalimu wa muziki kutoka Tanzania na kiongozi wa Mamajusi Choir Moshi, ametangaza rasmi kuwa atatoa wimbo mpya aliomshirikisha mwimbaji maarufu wa Injili Afrika, Rose Muhando.
Wimbo huo unaitwa “Mungu Unanipenda” na utatoka tarehe 1 Julai 2025 kupitia chaneli yake ya YouTube iitwayo Titus Band.
Akizungumza na Paradise, Titus amesema kuwa huu ni wimbo wa shukrani aliouandika mwenyewe baada ya kutafakari jinsi Mungu amekuwa mwema kwake: “Ni wimbo niliouandika mimi mwenyewe kwa ajili ya kumshukuru Mungu kwa wema wake mwingi. Nilimwita Rose Muhando tushirikiane, akakubali kwa furaha.”
Wimbo huu, kwa mujibu wa Titus, una nguvu ya kiroho kubwa sana, na anaamini utagusa na kubadilisha mioyo ya watu wengi.
Uhusiano wake na Rose Muhando:
Titus anamchukulia Rose Muhando kama mwanawe wa kiroho na kisanaa, kwa sababu ndiye aliyemfundisha muziki tangu akiwa kijijini.
“Nilimtoa kijijini, wakati huo hakuwa amewahi hata kuingia studio. Nilimfundisha kwa miaka mitano kule Kilimanjaro. Alijifunza muziki mikononi mwangu.”
Baada ya miaka hiyo ya mafunzo, uhusiano wao uliendelea kuwa mzuri, na hatimaye Rose akakubali kushiriki naye katika wimbo huu wa Mungu Unanipenda.
Sio wimbo wa Mamajusi Choir:
Ingawa Titus ni kiongozi wa Mamajusi Choir Moshi, alisisitiza kuwa huu ni wimbo wa kwake binafsi, si wa kwaya:
“Ndiyo mimi ni kiongozi wa Mamajusi, lakini huu wimbo si wa kwaya yetu. Ni wa kwangu binafsi, na utapatikana kwenye chaneli yangu binafsi ya Titus Band, siyo ya Mamajusi Choir.”
Historia ya Mamajusi Choir:
Mamajusi Choir ilianzishwa mwaka 1975 ikiwa na waimbaji 11 tu. Leo hii ina wanachama 86. Kwaya hii imetembea na kuhubiri kupitia muziki katika nchi mbalimbali ikiwemo Rwanda, Kenya, Uganda, Kongo na Malawi.
Titus alieleza kuwa walipitia changamoto nyingi, hasa ajali mbaya wakati wa kurekodi video ya wimbo Upendo Kuu, ambapo aliumia mkono na wengine pia walijeruhiwa. Lakini Mungu aliwalinda na kuwaimarisha.
“Tulipata ajali mbaya, lakini hatukupoteza maisha. Mungu alitulinda, na tumeendelea na huduma.”
Maudhui ya Wimbo wa ‘Mungu Unanipenda’:
Ni wimbo wa ushuhuda na shukrani, unaonyesha upendo mkuu wa Mungu kwa wanadamu.
“Ni wimbo wenye nguvu sana. Nina uhakika Mungu atautumia kuleta mabadiliko kwa wengi.”
Titus alimaliza kwa kuwashukuru Watumishi wa Mungu kutoka Rwanda, na kusema anatamani kutembelea Kigali siku moja.
Taarifa Muhimu:
• Jina la Wimbo: Mungu Unanipenda
• Wasanii: Titus Band ft Rose Muhando
• Siku ya Kutoka: 1 Julai 2025
• Chaneli ya YouTube: Titus Band
• Kwaya Anayoongoza: Mamajusi Choir Moshi
• Chaneli ya Kwaya: Mamajusi Choir Moshi
Subiri kwa hamu wimbo huu wa baraka, uliojaa nguvu ya Mungu kupitia sauti ya Titus Ezra Sambay na Rose Muhando.
Hakikisha una-subscribe kwenye channel ya Titus Band kwenye YouTube ili uwe miongoni mwa wa kwanza kusikiliza wimbo huu wenye nguvu utakapoachiliwa!
Titus Band na Rose Muhando
Mamajusi Choir
