Umuhanzikazi Bambuzimpamvu Anastasie uzwi nka Mama Paccy yamaze gushyira hanze indirimbo nshya yahaye izina rya "Ni muzima" yakoranye na Dacky Tune.
Mama Paccy ukunze gutanga ubuhamya bw’uko yatabawe akava mu buzima bukakaye, mu kiganiro yagiranye na Paradise.rw yadutangarije ko inganzo ye itazimye nubwo COVID-19 yagiye ikoma mu nkokora ibikorwa by’ubuhanzi ntakomeze kugeza indirimbo ku bakunzi be.
Yavuze ko mu ntangiriro z’uyu mwaka wa 2023 yasohoye igihangano yise "Ni muzima" gifite amashusho meza. Akomeza adutangariza byinshi kuri iki gihangano cyuzuyemo inama n’impanuro yewe n’ubuhanuzi ko Yesu ari muzima mu buzima bwa muntu.
Mama Paccy ukataje mu kugira imizingo y’indirimbo zihimbaza Imana, yibaza ku muntu udafite Yesu uko abayeho, akanamugira inama, ati "Mwemerere ature muri wowe". Yahamije ko yasanze umuntu ufite Yesu nta cyapfa kumukanga mu buzima.
Iyi ndirimbo amajwi (Audio) yayo yatunganijwe na Baraka Pro naho amashusho (Video) yayo akorwa na Tego The Chris. Iyi ndirimbo iri kuri YouTube kuri shene ya Mama Paccy.
Uyu muhanzikazi ukunze kuririmba ko Imana ikora kandi igahindura amateka, yamenyesheje abakunzi be ko bashonje bahishiwe, kuko yitegura kuzabamurikira vuba Album y’indirimbo nziza cyane zirimo n’iyo yamaze kugera ku bamukurikira ku mbuga nkoranyambaga.
RYOHERWA N’INDIRIMBO "NI MUZIMA" YA MAMA PACCY FT DACKY TUNE
