Karidinali Fridolin Ambongo usanzwe ari Arikiyepiskopi wa Kinshasa ndetse wigeze gutangaza ko itorwa rya Tshisekedi ryari ikinyoma, yahawe inshingano nshya zo kuba Umuyobozi Mukuru w’Ihuriro ry’Abepiskopi Gatolika muri Afurika.
Inama ya Komite Ihoraho y’Ihuriro ry’Abepiskopi muri Afurika na Madagasikari, yemeje Karidinali Fridolin Ambongo, Arikiyepiskopi wa Kinshasa, nk’umuyobozi mukuru w’Ihuriro ry’Abepiskopi muri Afurika. Akaba asimbuye kuri uyu mwanya Karidinali Richard Kuui Bawobbr witabye Imana.
Fridolin Ambongo Besungu wo muri Repubulika Iharanira Demokarasi ya Congo, yavutse tariki 24 Mutarama 1960. Yabaye Archbishop wa Kinshasa kuva tariki 1 Ugushyingo 2018. Yari asanzwe ari Musenyeri kuva mu 2004. Mbere y’uko aba Archbishop wa Kinshasa, yari Musenyeri wa Bokungu-Ikela kuva mu 2004 kugeza mu 2016.
Yabaye kandi Apostolic Administrator wa Kole kuva mu 2008 kugeza mu 2015, Apostolic Administrator wa Mbandaka-Bikoro mu 2016 na Archbishop kuva mu 2016 kugeza mu 2018, Apostolic Administrator wa Bokungu-Ikela kuva mu 2016 kugeza mu 2018, ndetse na Coadjutor Archbishop wa Kinshasa mu 2018.
Fridolin Ambongo yagizwe Karidinal na Papa Francis, hari tariki 5 Ukwakira 2019. Papa Yohana Paul II ni we wamuhaye inshingano zo kuba Musenyeri wa Bokungu-Ikela tariki 22 Ugushyingo 2004. Muri Werurwe 2015 yatangaje ko yagabweho ibitero bigamije kumwica, icyo gihe yavuze ko ubuzima bwe buri mu kaga. "Ndi mu kaga, kandi uko ni ukuri".
Azwiho kugaragaza ukuri kuri mu mutima we ntahishe mu nda. Ubwo biteguraga uruzinduko rwa Papa Francis muri DRC, Karidinali Fridolin Ambongo yagiranye ikiganiro n’abanyamakuru, yongera gushimangira aho Kiliziya Gatolika ihagaze ku byavuye mu matora y’Umukuru w’Igihugu mu 2018.
Yavuze ko "Turabizi ko itorwa rya Tshisekedi ryari ikinyoma, twarabivuze, ariko Umuryango Mpuzamahanga wemeye iryo torwa". Yakomeje avuga ko nta mbaraga yari afite zo kwitandukanya n’abandi.
Tubibutse ko Karidinali Fridolin Ambongo yasimbuye Karidinali Laurent Monsengwo ku nshingano zo kuba Musenyeri wa Kinshasa. Uyu Laurent Monsengwo yari mu batavuga rumwe n’ubutegetsi bwa DRC ndetse yigeze kwingingirwa gusimbura Kabila, arabyanga.
Tariki 11 Nyakanga 2021 ni bwo Karidinali Laurent Monsengwo yitabye Imana azize uburwayi. Karidinali Fridolin Ambongo kimwe na mugenzi we yasimbuye Karidinali Laurent Monsengwo, bose bazwiho kutavuga rumwe n’Ubutegetsi bwa DRC.
Karidinali Fridolin Ambongo
