Mukakanani Caline watakaje urugingo rw’ukuguru, afite ibihangano by’indirimbo zihimbaza Imana bigera kuri 15, akaba afite inzozi zo kuzagera ku kigero cya Kabaganza Liliane dore ko ari we mugore afata nk’icyitegererezo.

Paradise.rw yaramwegereye imaze kumva impano y’ijwi ryiza afite mu kuramya no guhimbaza Imana tumubaza bynishi kuriyo. Mukakanani Caline yavuze ko yakijijwe akiri muto aririmba muri Korari Inzira y’Umwami y’abana ba Sandy School mu Itorero rya Batisita.

Yakomeje avuga ko nta muntu wo mu muryango akomoraho iyi mpano ahubwo yisanze ayifite mu bana umunani bavukana badahuje ba se. Agira ati "Ndashima Imana yagiye ibana nanjye nkiri urusoro mu nda ya mama nkabona mbayeho.

Izina Mukakanani ndi imbyaro ya munani, twavutse ku bagabo batandukanye, papa yapfuye nyuma ya Jenoside yakorewe Abatutsi, nari ngeze igihe cyo kumumenya, nta munani yasize ampaye nta na jaride ngira".

Yavuze uko yagize ingorane akarwara kanseri bakamuca akaguru, akaba amaze kwandika ibihangano by’indirimbo zihimbaza Imana ariko yabuze umutera inkunga ngo zitunganywe zijye ku mugaragaro.

Mu ijwi ryuje agahinda aragira ati: "Nkunda abahanzi b’ibyamamare bambera icyitegererezo, nk’umubyeyi Kabaganza Liliane nanjye numva nzatera ikirenge mu cye nkagera ku rwego ari ho. Ndamukunda cyane".

Yavuze ko mu mwaka wi 2011 "narwaye kanseri bigeze mu 2012 banca akaguru byatumye ndushaho kwegera Imana cyane ndasenga bituma nyibaza ibimbayeho insubiza ko ari ukugira ngo imirimo yayo yerekanirwe muri njye".

Ati "Abandi bahanzi mfatiraho icyitegererezo ni Richard Ngendahayo na Patrick Nyamitari na Geraldine "

Ntitwasoza iyi nkuru tutavuze ku bihangano bya Mukakanani Caline asaba abakunzi be kumutera inkunga bikajya muri studio bigatunganya bikagera kuri benshi.

Ati "Ndasaba abakunda ibihangano byajye kuntera inkunga bikajya ahagaragara, ndabizi bizafasha benshi kandi Imana izabaha umugisha mbonye ubushobozi n’ukwezi kumwe najya muri studio nkazisohora".

Mu 2012 ni bwo Caline yarwaye cancer birangira mu 2012 bamuciye ukuguru

Afite ibihangano byinshi ariko yabuze ubushobozi bwo kujya muri studio