Ibibazo bimaze iminsi bivugwa hagati y’umuhanzi Vestine Ishimwe n’umugabo we Idrissa Jean Luc Ouédraogo byakomeje gukurura ibitekerezo bitandukanye mu ruhame, cyane cyane ku mbuga nkoranyambaga.

Impande zombi zagiye zitanga ibisobanuro ku bibazo byabo, mu gihe bamwe mu bantu babagiriye inama cyangwa bagize uruhare mu rugendo rwabo rwa muzika na bo bagiye bagarukwaho muri iyi nkuru.

Mu gihe ibibazo byabo bikomeje gukurikiranwa mu nzira zemewe n’amategeko, Vestine na Dorcas na bo bakomeje ibikorwa byabo bya muzika, ndetse batangiye kwamamaza indirimbo nshya “Ibihe”.

Ibi byatumye iyi nkuru ikomeza kuvugwa no hanze y’umuryango, bamwe bayirebamo ikibazo cy’urugo, abandi bakibanda ku buryo ibyamamare n’abari hafi yabo bakomeje kukigarukaho ku mbuga nkoranyambaga.

Muri uwo mwuka, Gisizi yanditse ubutumwa burebure budafute uruhande ibogamiyeho hagati ya Vestine na Idrissa, ahubwo busaba buri wese uri muri iyi nkuru gutekereza ku ngaruka z’amagambo n’ibikorwa bya none, cyane cyane ku bana, ku cyubahiro cy’abagize umuryango no ku mateka ashobora gusigara kuri Internet imyaka myinshi.

Hari ibihe umuntu atandika ngo ahangane n’umuntu, ahubwo yandika kugira ngo ejo hatazavuga ko abantu bose barebera. Hari ibihe ukuri kutagira uruhande, urukundo ntirugire ikipe, n’ububabare bw’umuryango ntibukwiye guhinduka intwaro yo kurasana ku mbuga nkoranyambaga.

Ni muri uwo murongo Gisizi yibukije Vestine, Idrissa, Dorcas, Irene Murindahabi, Past Claude n’abandi bafite aho bahuriye n’iki kibazo ko hari ikintu gishobora kuruta cyane intambara iri kuba uyu munsi: amateka bazasigira abana babo.

Vestine, uyu munsi abantu barakureba. Amagambo yawe arumvikana, indirimbo zawe zirakundwa, inkuru yawe irasomwa, kandi iyo uvuze ku mbuga nkoranyambaga hari abantu benshi bahita bumva ibyo uvuze.

Ariko umunsi uzagera Internet ituze, abantu bagire izindi nkuru, abandi bahanzi baze, indirimbo nshya zisohoke, abakunzi b’uyu munsi bagire ibindi bibashimisha. Ariko wowe uzaba ugisigaye uri Vestine.Imyaka izagenda, 10, 20, 30, 40, wenda 50.

Umwana wawe azakura, amenye gusoma, amenye gushakisha amakuru kuri Internet, maze umunsi umwe ashakishe izina rya nyina.

Ashobora kubona indirimbo zawe, amafoto yawe n’amateka y’umuziki wawe, ariko ashobora no kubona ibihe bikomeye wanyuzemo, amagambo wavuze, ayo se yavuze n’ibyo abandi bavuze. Maze wenda akibaza ati: “Ese koko ibi byose byari ngombwa ko mbona?”

Icyo gihe nta views zizaba zisigaye ngo zisubize icyo kibazo. Nta hashtag, nta trend, nta promotion. Hazaba hasigaye amateka gusa.

Ni yo mpamvu Gisizi asaba Vestine kureba kure y’amarangamutima y’uyu munsi, kuko ububabare bushobora kuba impamvu yo kuvuga, ariko ntabwo buri jambo umuntu avuze mu gihe ababaye rizaba rikiri iryo kwishimira nyuma y’imyaka myinshi.

Dorcas na we, kuba uri hafi ya Vestine ni urukundo. Ariko urukundo si buri gihe ruvuga ngo “reka tubwire isi.” Rimwe na rimwe urukundo ruvuga ruti: “Mukuru wanjye, ndakuzi, ndumva ububabare bwawe, ariko hari ibyo isi itagomba kumenya.

”Hari igihe gufata umuntu ukuboko mu ibanga biruta kumuvugira imbere y’abantu ibihumbi. Hari igihe kumubuza kuvuga ari bwo buryo bwiza bwo kumurinda ejo. Kuba hafi y’umuntu si ugushyigikira buri jambo avuga; rimwe na rimwe ni ukumubwira uti: “Aha ndaguhagarika kuko ndabona ejo.”

Idrissa na we, niba hari ibyo avuga ko yakorewe cyangwa ibyo atemeranyaho n’ibivugwa n’uwahoze ari umugore we, afite uburenganzira bwo kubisobanura no gukoresha inzira zemewe n’amategeko. Hari inzego zibishinzwe, hari ubutabera, kandi hari ukuri kugomba kugenda kugaragara aho kugomba kugaragara.

Ariko iyo umuntu yakunze umuntu, akabana na we, akubaka na we urugo, ntibikwiye ko umunsi ibintu bitagenze neza, buri jambo, buri gikomere na buri banga bihinduka amasasu yo kurasana imbere y’imbaga.

Kwiyambaza ubutabera ni uburenganzira; guhindura amakimbirane y’urugo intambara y’imbaga ni ikindi kintu.

M. Irene na we, Gisizi amwibutsa ko umuntu umaze imyaka myinshi hafi y’umuhanzi aba afite amateka menshi. Aba azi aho yavuye, ibyo yanyuzemo n’ibyo rubanda batazi.

Ni yo mpamvu iyo habaye ikibazo, ijambo rye rishobora kugira uburemere burenze ubw’umuntu usanzwe. Ntabwo buri kintu umuntu azi kiba kigomba kuvugwa.

Hari amateka aba afite nyirayo, hari amabanga agomba kuguma mu bubiko bw’umutima, kandi hari ukuri gushobora kuvugwa ejo ariko uyu munsi kukagira uwo kwica.

Iyo abantu bakuru batangiye guterana amagambo, abantu bakabatiza amashyi, abanyamakuru bakabishyiramo umuriro, social media ikabara views, umuryango uba utangiye kubura abantu bawurinda.

Pastor Claude n’abandi bafite ijambo muri iki kibazo na bo bakwiye kwibuka ko ijambo ry’umuntu w’umwuka rikwiye kuba amazi ku muriro, atari lisansi. Hari igihe ukwiye kuvuga uti: “Ndakwumva.”

Ariko ntibisaba kubwira isi ibintu byose wamenye. Hari igihe Imana idakeneye umuntu wongera ijwi ku rusaku, ahubwo ikenera umuntu uvuga ati: “Ceceka gato. Igihe kizabwira buri wese ibyo atashoboye kuvuga uyu munsi.”

Kuko iyo abantu babiri bari mu bibazo, si buri gihe hakenewe undi muntu wo kongera umuriro hagati yabo.

Muri ibi byose ariko, Gisizi yashimiye abanyamakuru bamwe bahisemo kutagira ikibazo cy’umuryango igicuruzwa cyo gushaka clicks. Hari abanze gufata uruhande, abanze kwandagaza Vestine, abanze kwandagaza Idrissa, ndetse n’abibukije ko kuba umuntu ari icyamamare bitamwambura uburenganzira bwo kugira ubuzima bwite n’icyubahiro.

Itangazamakuru ry’umwuga si irivuga byinshi gusa; ni irizi aho rigomba guhagarara. Si buri muriro ukenera umunyamakuru wo kuwongeramo inkwi. Hari igihe umunyamakuru akwiye kuvuga ati: “Ibi ntabwo ngiye kubigira intambara.” Iryo na ryo ni itangazamakuru.

Gisizi kandi yashimiye ibyamamare n’inshuti zikomeje kuba hafi y’uyu muryango muri ibi bihe. Kuko kuba hafi y’umuntu uri mu bibazo ntibisaba gushyira ifoto ye kuri status cyangwa kuvugira ibibazo bye imbere y’imbaga.

Hari inshuti imufata ukuboko mu cyumba gifunze, hari imubwira ukuri atifuza kumva, hari imubwira iti: “Reka nkwambike ikanzu y’ubwenge uyu munsi, kuko amarangamutima yawe ashaka kukwambika iy’uburakari.” Abo ni inshuti.

Naho kuri “Ibihe”, Vestine na Dorcas bafite uburenganzira bwo gukomeza umuziki wabo. Niba iyi ndirimbo ari ubuhamya bwavuye ku mutima, nta muntu ukwiye kubabuza kuyiririmba.

Ariko hari umurongo muto cyane uri hagati yo guhindura ububabare ubuhamya no guhindura ububabare content. Uyu munsi indirimbo ishobora kuzamuka, views zikiyongera, comments zigaturika, abantu bakayiganiraho, ariko nyuma y’imyaka 50 nta muntu uzongera kubara views. Hazasigara amateka.

Ni yo mpamvu Gisizi abaza ati: “Ese ibyo ndi gukora uyu munsi, nzabyishimira kubisubiramo nkiri umubyeyi w’imyaka 80?” Kuko views zirashira, trend irarangira, indirimbo irasaza, ariko amateka y’umuntu araguma.

Umuryango si content. Urugo si headline. Abana si audience. Ububabare si marketing strategy. Amarira si promotion. Kandi gusebanya si ubuhamya.

Hari ibintu umuntu ashobora gutsindira kuri Internet, ariko akabitsindwamo n’amateka. Hari umuntu ushobora gutsinda impaka uyu munsi, ariko akazatsindwa n’umutima we ejo.

Hari umuntu ushobora kubona abantu ibihumbi bamushyigikira, ariko akazabura umuntu umwe wo kumubwira ati: Icyo wakoze ntabwo cyari gikwiye.”

Vestine na Idrissa, niba koko mwageze aho mutabasha gukomeza kubana, mwirinde ko gutandukana kwanyu kuba urupfu rw’icyubahiro cyanyu.

Urugo rushobora kurangira, ariko ububyeyi burakomeza. Umwana ntakwiye kurera amateka y’intambara y’ababyeyi be. Niba hari uwababaje undi, ukuri kuzamenyekana aho kugomba kumenyekana. Niba hari amakosa yakozwe, uwabikoze azabibazwa. Ariko ntimureke isi ibahindure abanzi batagira icyo bibuka ku rukundo rwigeze kubaho.

Kuko umunsi umwe umwe muri mwe ashobora gufata ifoto ya kera, akareba abantu babiri bari muri yo, maze akibaza ati: “Ni ryari twavuye kuri bariya bantu tukagera kuri aba?”

Iri baruwa si iryo guhitamo uruhande. Ni iryo kwibutsa abantu bose ko umuriro uragurumana, ariko iyo uzimye ivu riraguma. Inkuru irarangira, video irasibwa, status iramanuka, comment iribagirana, trend irashira, ariko umwana wawe azagumana izina ryawe.

Ni yo mpamvu Gisizi asaba impande zose kugira ubwitonzi: mureke hari ibyo mudakwiriye kuvugira mu ruhame, musigeho mutagira ibyo mwangiza, mureke hari ibyo mudakwiriye kugira content, mureke hari ibyo mutambutsa imbere y’Imana aho kubitambutsa imbere ya camera.

Kuko rimwe na rimwe gutsinda si ukubwira isi ko ari wowe ufite ukuri. Gutsinda ni ukuba warinze umutima w’umwana wawe, warinze icyubahiro cy’uwo mwigeze gukundana, warinze izina ryawe, maze igihe nikigera ukabasha kuvuga uti: “Nari nababaye… ariko sinigeze nemera ko ububabare bwanjye buhindura umuntu nari we.”

Yari umukunzi wanyu inshuti y’amahoro

Gisizi wa Paradise