Mu gihe Ishimwe Vestine ari mu nzira z’amategeko zo gutandukana n’umugabo we Idrissa Jean Luc Ouédraogo, we na murumuna we Dorcas bakomeje ibikorwa by’umuziki, ndetse batangaje ko bagiye gushyira hanze indi ndirimbo nshya bise Ibihe.
Iyi ndirimbo itegerejwe mu gihe ubuzima bwite bwa Vestine bukomeje gukurikiranwa cyane, ariko we na Dorcas bakaba bakomeje kugaragaza ko gahunda yabo y’umuziki itahagaze.
Ku wa 14 Nzeri 2026, Vestine yemeje ko yatangiye inzira yo gusaba gatanya, nyuma y’uko dosiye ijyanye n’itandukana ryabo igaragaye ku Rukiko rw’Ibanze rwa Kicukiro.
Mu kiganiro yagiranye na IGIHE, yavuze ko yafashe icyo cyemezo nyuma yo kubona amakuru n’ibimenyetso avuga ko umugabo we yaba yaragiranye imibanire n’abandi bagore babiri akanabatera inda. Ibyo ni ibirego byatanzwe na Vestine, mu gihe Ouédraogo yabihakanye.
Ikindi gishya cyagaragaye mu rubanza ni uko ku wa 17 Nzeri 2026, Idrissa Ouédraogo yagejeje ku Rukiko rw’Ibanze rwa Kicukiro ikirego gisaba ko ahabwa uburyo bwo kubona umwana avuga ko yabyaranye na Vestine, ndetse asaba n’isuzuma rya ADN kugira ngo hamenyekane niba ari se w’umwana. Ibi biri mu zindi mpinduka nshya zaje mu gihe cy’uru rubanza rwa gatanya.
Nyuma y’iyi nkuru, kuri uyu wa 19 Nzeri 2026, Vestine na Dorcas bashyize ku mbuga nkoranyambaga amashusho n’amafoto ateguza indi ndirimbo yabo bise ibihe, ndetse ubutumwa bashyizeho bwakururiye benshi kuyivugaho.
Mu butumwa buherekeza ayo mafoto, bashyizeho umurongo wo mu Baroma 8:28 ushingiyeho indirimbo, ahavuga ko “Ku bakunda Imana, ibintu byose bifatanyiriza hamwe kugira ngo bibazanire ibyiza, ari bo bahamagariwe kuba mu mugambi wayo.”
Ubutumwa bwabo bwakiriwe neza n’abakunzi babo benshi, bamwe babagaragariza ko babashyigikiye. Mu bitekerezo byatanzwe kuri iyo nyandiko harimo abavuze ko “nta mpamvu yo guhagarara”, abandi babifuriza gukomeza kuba beza no gukomera, mu gihe hari n’abifashishije imirongo ya Bibiliya babasabira umugisha n’amahoro.
Iyi ndirimbo nshya kandi ije nyuma y’igihe gito Vestine na Dorcas batangiye icyiciro gishya cy’umuziki nyuma yo gutandukana na MIE Music. Ku wa 13 Kamena 2026, batangaje ko bahagaritse imikoranire yabo na MIE Music nyuma y’imyaka bari bamaze bakorana. Nyuma yaho bavuze ko nta kibazo bafitanye na Murindahabi Irene, ndetse Dorcas avuga ko bakomeje kuvugana.
Indirimbo Ibihe iri guteguzwa kandi ikurikiye “Itabaza”, indirimbo Vestine na Dorcas bashyize hanze muri Nyakanga 2026 nyuma yo gutandukana na MIE Music. Yasohotse ku wa 13 Nyakanga 2026, kandi kugeza ubu, “Itabaza” ni imwe mu ndirimbo zabo iri kwitabwaho cyane. Umubare wa Views urenga miliyoni 5 mu gihe cy’ukwezi kumwe igaragaza umusaruro yatanze.
Mu gihe ibyo bibazo bikiri mu nkiko, Vestine na Dorcas bo bakomeje gutegura indi ntambwe mu muziki. Indirimbo nshya Ibihe barimo guteguza ni yo iri gutuma abakunzi babo bongera kwibaza icyo aba bahanzikazi babiri bagiye kuvuga muri iki gihe, cyane ko ubutumwa buyiherekeje bwibanda ku Baroma 8:28 no ku gukomeza kwizera ko ibintu byose bishobora kuzanira ibyiza abakunda Imana.
Indirimbo bayiteguje mu gihe bakiri kubarizwa muri Kanada
